QR Premer-Ministri Asqar Mamin Shymkent qalasyna jumys sapary aiasynda qalany damytý máseleleri jóninde keńes ótkizdi, dep habarlaidy QR Úkimetiniń baspasóz qyzmeti.
Shymkentti damytýdyń 2019-2023 jyldarǵa arnalǵan keshendi josparyn iske asyrý týraly, áleýmettik-ekonomikalyq jaǵdai, infraqurylymdyq qurylys, elektrmen jáne gazben jabdyqtaý, sondai-aq, qalanyń 2020 jyly TMD-nyń mádeni astanasy mártebesin alýy aiasynda is-sharalardy ótkizýge daiyndyǵy týraly Shymkent qalasynyń ákimi Murat Áitenov, Mádeniet jáne sport ministri Aqtoty Raiymqulova, Indýstriia jáne infraqurylymdyq damý birinshi vitse-ministri Qaiyrbek Óskenbaev, Ulttyq ekonomika vitse-ministri Ermek Alpysov jáne Energetika vitse-ministri Jumabai Qaraǵaev, «Báiterek» UBH» AQ basqarma tóraǵasy Aidar Áriphanov baiandady.
«Biyl Shymkent TMD-nyń mádeni astanasy bolyp tabylady. Osy jyldyń resmi ashylýyna QR Prezidenti Qasym-Jomart Kemeluly Toqaev qatysady dep josparlanǵan», - dedi A. Mamin.
Úkimet basshysy ózekti áleýmettik-ekonomikalyq máseleler men qala turǵyndarynyń turmys sapasyn arttyrý máselelerin ýaqytyly sheshýdiń, sondai-aq TMD-nyń mádeni astanasy jyly aiasynda josparlanǵan barlyq is-sharalardy joǵary deńgeide ótkizýdiń mańyzdylyǵyn atap ótti.
A. Mamin tiisti memlekettik organdarǵa jáne Shymkent qalasynyń ákimdigine TMD-nyń mádeni astanasy jyly aiasyndaǵy barlyq is-sharalarǵa sapaly daiyndyqty qamtamasyz etýdi, sonymen qatar eki apta merzim ishinde sýmen, elektrmen jáne gazben jabdyqtaý, turǵyn úi qurylysy jáne kólik salalarynda infraqurylymdyq jobalardy qarjylandyrý máselelerin qaraýdy tapsyrdy.
Jumys sapasy aiasynda A. Mamin Shymkent qalasyndaǵy halyqaralyq áýejaidaǵy ótkizý qabileti saǵatyna 2000 jolaýshyny quraityn jolaýshylar terminalynyń salyný barysymen tanysty, ony biyl qazan aiyna qarai aiaqtaý josparlanǵan.
Ońtústik AEA aralaý kezinde Úkimet basshysyna 1700-den asa jańa jumys ornyn qurýmen jalpy somasy 58,8 mlrd teńge bolatyn, qazir iske asyrylyp jatqan 23 joba týraly baiandaldy. Iri perspektivaly jobalardyń biri retinde 2020-2025 jyldary salynatyn sorǵylaý jabdyqtary men qubyr armatýrasyn óndiretin zaýyt qurylysy tanystyryldy. Jobanyń quny - 26,5 mlrd teńge, 1500 jumys orny qurylady.
Premer-Ministr uzaq jyldardan beri jumysy toqtap qalǵan tigin jáne jip iirý toqyma fabrikalaryna baryp, «Qazaqstannyń investitsiialyq qory» AQ-nyń olardy iske qosý jáne Qazaqstannyń toqyma klasterin odan ári damytý jobalarymen tanysty. Kásiporyndardy biyl paidalanýǵa berý josparlanyp otyr, bul 800-ge jýyq jańa jumys orny men Qazaqstanda óńdeletin maqta kóleminiń eki ese ósimin qamtamasyz etedi.
Úkimet basshysy arheologiialyq qazbalar kezinde tabylǵan «Shymkent qalashyǵy» (Tsitadel) restavratsiialaý jáne mýzeilendirý jobasynyń iske asyrylý barysyn tekserdi. Munda ejelgi dáýir mýzeii, galereia, amfiteatr salynatyn bolady. Jobanyń tarihi qundylyǵy zor jáne ol Shymkenttiń tartymdy týristik nysanyna ainalady.
Óńirdiń týristik áleýetin damytý aiasynda A. Mamin sonymen qatar Shymkent qalasynan 60 shaqyrym qashyqtyqta ornalasqan Túrkistan oblysy Tóle bi aýdanyndaǵy Qasqasý shatqalyna baryp, «Qasqasý» týristik rekreatsiia kesheniniń jobasymen tanysty.
