QR Premer-Ministri Asqar Mamin Gaaga qalasyna resmi sapary aiasynda Niderlandy Premer-Ministri Mark Riýttemen kelissózder júrgizdi, sondai-aq Qazaqstan‒Niderlandy biznes-forýmynyń ashylýyna qatysty, dep habarlaidy "Ult aqparat".
M. Riýttemen kezdesý barysynda saýda-ekonomikalyq jáne investitsiialyq yntymaqtastyqty, energetika, qarjy, kólik-logistika, aýyl sharýashylyǵy, AT, ǵylymi salalardaǵy ózara is-qimyldy odan ári keńeitý perspektivalary talqylandy.
«QR Tuńǵysh Prezidenti Nursultan Nazarbaev Qazaqstannyń Niderlandymen turaqty seriktestik ózara qarym-qatynastarynyń negizin saldy. Memleket basshysy Qasym-Jomart Toqaev beibitshilikti jaqtaýshy kópvektorly syrtqy saiasattyń sabaqtastyǵyn saqtaidy jáne ekijaqty yntymaqtastyqty nyǵaitýǵa erekshe kóńil bóledi», — dedi A. Mamin.
Niderlandy — Qazaqstannyń Eýropadaǵy negizgi saýda-ekonomikalyq jáne investitsiialyq seriktesteriniń biri. Táýelsizdik jyldary Niderlandydan Qazaqstanǵa tikelei investitsiialardyń jalpy aǵymy $92 mlrd-tan asty. QR-da Niderlandy kapitalynyń qatysýymen 900-den astam kásiporyn jumys isteidi. 2018 jyldyń qorytyndysy boiynsha ekijaqty taýar ainalymy $6,5 mlrd qurady.
Óz kezeginde, M. Riýtte Qazaqstan Premer-Ministriniń Niderlandyǵa resmi sapary ekijaqty yntymaqtastyqty odan ári damytýǵa eleýli serpin beretinine senim bildirdi.
Qazaqstan Respýblikasynyń jáne Niderlandy Koroldiginiń Premer-Ministrleri V Qazaqstan‒Niderlandy biznes-forýmynyń ashylýyna qatysty, onyń aiasynda eki eldiń Úkimet basshylarynyń qatysýymen 5 qujatqa qol qoiyldy:
-
«K-Agro» qazaqstandyq kompaniiasy men niderlandylyq «Farm Frites» kompaniialary arasyndaǵy Jambyl oblysynda fri kartobyn óndiretin birlesken kásiporyn qurý týraly kelisim. Jobanyń quny — $145 mln;
-
«Qazaqstan Ǵarysh Sapary» UK» AQ men «NEVASCO» kompaniialar toby arasyndaǵy Jerdi qashyqtyqtan zondtaý (JQZ) jáne geoaqparattyq júieler (GAJ) salasyndaǵy jobalardy iske asyrý boiynsha yntymaqtastyq týraly kelisim;
-
Qazaq ulttyq agrarlyq ýniversiteti men «Vaheningen» ýniversiteti arasyndaǵy qazaqstandyq agrarii stýdentterdi oqytý boiynsha yntymaqtastyq týraly memorandým. «Vaheningen» ýniversiteti ‒ jaratylystaný ǵylymdary, tabiǵi resýrstardy basqarý, ósimdik sharýashylyǵy jáne mal sharýashylyǵy salasyndaǵy álemdegi jetekshi ortalyqtardyń biri;
-
«TKSh Qazortalyǵy» AQ-men «Witteven+Bos» arasyndaǵy kanalizatsiialyq tazartý qurylystaryn salý jáne rekonstrýktsiialaý týraly baǵdarlamany iske asyrý jónindegi ózara túsinistik týraly memorandým;
-
«Dal Agro Park» pen «Dutch Greenhouse Delta» arasyndaǵy Túrkistan oblysynda 200 gektar agropark salý boiynsha yntymaqtastyq týraly memorandým.
Forýmǵa 200-ge jýyq niderlandtyq jáne qazaqstandyq biznes ókilderi qatysty. «Báiterek» UBH» AQ, «QazMunaiGaz» UK» AQ, AHQO, Deloitte, Shell, Niderlandynyń Biznes jáne jumys berýshiler konfederatsiiasynyń jáne t.b. ókilderi eki el arasyndaǵy saýda-ekonomikalyq jáne investitsiialyq ózara is-qimyldy damytý perspektivalary týraly baiandady. Forýmǵa qatysýshylar óz múmkindikterimen tanystyryp qana qoimai, sonymen birge B2B (business-to-business) formatynda áleýetti seriktestermen jumys kezdesýleri men kelissózder ótkizdi.
QR Premer-Ministri Shell, Bitfury, SuezGroup, Farm Frites, Dutch Fruit Solutions niderlandtyq kompaniialarynyń ókilderimen kezdesýler ótkizdi, olarmen Qazaqstanda energetika, derekterdi óńdeý jáne blokchein-tehnologiialar, bilim berý, aýyl sharýashylyǵy ónimderin óńdeý jáne t.b. salalardaǵy jobalardy júzege asyrýdyń perspektivalary talqylandy.
Úkimet basshysy World Horti Centre halyqaralyq jylyjai baǵbanshylyǵyna arnalǵan bilim jáne innovatsiialar ortalyǵyna baryp, haiperlýp (Hyperloop) jańa kólik júiesin ázirleýmen ainalysatyn «Hardt Hyperloop» kompaniiasynyń qyzmetimen tanysty, bul kólik júiesi jeńildetilgen bolat qubyrlar boiymen kapsýla túrindegi shaǵyn qaiyqtarda saǵatyna 1 myń shaqyrymǵa deiin jyldamdyqpen júrýge múmkindik beredi.
