Asqar Mamin TMD jáne EAEO otyrystaryna qatysyp, Dmitrii Medvedevpen kelissóz ótkizdi, dep habarlaidy Premer-Ministrdiń baspasóz qyzmeti.
QR Premer-Ministri Asqar Mamin Máskeýge sapary aiasynda Táýelsiz Memleketter Dostastyǵynyń (TMD) Úkimet basshylary keńesiniń (ÚBK) jáne Eýraziialyq úkimetaralyq keńestiń (EÚAK) otyrystaryna qatysyp, onda TMD jáne EAEO keńistiginde ekonomikalyq integratsiiaǵa qatysty ózekti máselelerdi sheshý boiynsha birqatar bastamalardy kóterdi.
TMD ÚBK shaǵyn quramda ótken otyrysynda Qazaqstan Premer-Ministri Dostastyq aiasynda saýda kooperatsiiasyn odan ári nyǵaitý, «ósýdiń jańa núktelerin» izdeý jáne investitsiialyq kapitaldy tartý máselelerinde proaktivti pozitsiiany qalyptastyrýdyń qajettiligine nazar aýdardy.
Úkimet basshysy aldaǵy úsh jylǵa arnalǵan TMD investitsiialyq strategiiasyn ázirleýdi, ozyq tájiribelermen almasý jáne qarjylyq qyzmetterdi ózara usyný jumystaryn jandandyrý úshin «Astana» halyqaralyq qarjy ortalyǵynyń (AHQO) múmkindikterin paidalanýdy usyndy.
Premer-Ministr TMD aiasynda kórsetiletin qyzmetterdiń erkin saýdasy týraly kelisim jobasyn kelisý jumystaryn jedeldetýdiń mańyzdylyǵyn atap ótti, sondai-aq TMD elderiniń ónerkásiptik kooperatsiiasyn damytýdyń 2025 jylǵa deiingi jańa baǵdarlamasyn ázirleý týraly bastama kóterdi.
TMD ÚBK shaǵyn jáne keńeitilgen quramdardaǵy otyrystarynyń qorytyndylary boiynsha birqatar qujattar qabyldandy, onyń ishinde TMD-ǵa múshe memleketterdiń qoǵamdy tsifrlyq damytý salasyndaǵy yntymaqtastyq tujyrymdamasy jáne ony iske asyrýdyń birinshi kezektegi is-sharalar jospary, TMD-ǵa qatysýshy memleketterdiń aqparattyq qaýipsizdigin qamtamasyz etý strategiiasy jáne t.b. bar. Dostastyqqa tóraǵalyq etý Túrikmenstannan Ózbekstanǵa ótti, TMD ÚBK kezekti otyrysyn 2020 jylǵy mamyr aiynda Tashkent qalasynda ótkizý josparlandy.
Eýraziialyq úkimetaralyq keńes (EÚAK) otyrysynda QR Premer-Ministri A. Mamin ózara saýda-sattyqty damytý jolynda basymdyqty mindet retinde EAEO ishki naryǵyndaǵy ákimshilik kedergilerdi keshendi túrde joiýdy atady.
«Biznes betpe-bet kelip otyrǵan qoldanystaǵy Kedergilerdi joiý tártibi transparenttilikti jáne qabyldanatyn sheshimderdiń tiimdiligin qamtamasyz etýge múmkindik bermeidi. Osyǵan bailanysty Tártipke túzetýler Eýraziialyq ekonomikalyq komissiiaǵa (EEK) joldandy, bul túzetýler sheshimderdi ázirleý protsesin retteýge jáne shaǵymdardy qarastyrý merzimin qysqartýǵa múmkindik beredi», — dedi A. Mamin.
Qazaqstan Premer-Ministri EAEO-ǵa múshe memleketterdiń úkimetterin Eýraziialyq ekonomikalyq odaqta tsifrlyq saýdany damytý úshin jaǵdailar jasaý boiynsha ázirlenip jatqan Jol kartasy aiasynda úshinshi elderge taýarlar men qyzmetter eksportyn yntalandyrýǵa jáne tsifrlyq saýda arnalaryn damytýǵa erekshe kóńil bólýge shaqyrdy.
Úkimet basshysy úshinshi elderdiń aýyl sharýashylyǵy naryqtaryna shyǵý boiynsha birlesken jumystardy júrgizý qajettigin atap ótti.
«EEK-ke bizdiń aýyl sharýashylyǵy ónimderimizdiń shetel naryqtarynda bolýyna taldaý júrgizip, biz básekeles bolyp otyrǵan taýarlar tizimin anyqtap, eksportty ulǵaitý úshin naqty sharalar usynýdy tapsyrýdy usynamyn», — dedi Premer-Ministr.
A. Mamin EAEO aiasynda mobildi operatorlardyń roýmingin kezeń-kezeńmen alyp tastaý boiynsha birlesken jospardy ázirlep, iske asyrýdy usyndy.
«EAEO-ǵa múshe memleketterdiń árbir azamaty ekonomikalyq integratsiianyń naqty paidasyn sezinýi tiis. Tehnologiialar turǵysynan «ózimizge» jáne «qonaqtarǵa» qyzmet kórsetýde esh aiyrmashylyq joq. Másele zańnamalar men operatoraralyq tarifterdiń aiyrmashylyqtarynda. Eýropalyq odaq roýmingti alyp tastaýǵa 10 jyl boiy tyrysty, sonyń nátijesinde 2017 jyly ol alynyp tastaldy», — dedi Qazaqstan Úkimetiniń basshysy.
Premer-Ministr ómirlik mańyzy bar dári-dármekter naryqtarynda básekeli jaǵdailar jasaý boiynsha usynystar ázirlep, osy saladaǵy halyqaralyq erejelerdi eskerýmen qosymsha tekserý rásimderin júrgizbei-aq, ózara moiyndaý múmkin bolatyn preparattar jelisin naqtylaýdy usyndy.
EÚAK otyrysynyń qorytyndysy boiynsha Serbiia Respýblikasymen Erkin saýda aimaǵy týraly kelisimge, Aýyl sharýashylyǵynda maldarǵa selektsiialyq-asyl tuqymdandyrý jumystaryn júrgizýdi biregeilendirýge baǵyttalǵan sharalar týraly kelisimge, Baǵaly metaldar jáne baǵaly tastarmen operatsiialar júrgizýdiń erekshelikteri týraly kelisimge jáne birqatar basqa qujattarǵa qol qoiyldy.
Sonymen qatar, sapar aiasynda QR Premer-Ministri A. Mamin RF Úkimetiniń Tóraǵasy D. Medvedevpen ekijaqty kelissózder ótkizdi, onyń barysynda saýda-ekonomikalyq ózara is-qimyldy, tranzittik-kólik jáne ónerkásiptik salalardaǵy yntymaqtastyqty odan ári damytý máseleleri talqylandy.
