Májilis depýtattarynyń resmi saýalyna jaýap bergen QR Premer-ministri Asqar Mamin legioner fýtbolshylar aldyndaǵy bereshektiń paida bolý sebebin aitty, dep habarlaidy QazAqparat tilshisi.
«Qazaqstan Respýblikasy Biýdjet kodeksiniń 211-babyna sáikes jergilikti atqarýshy organdar óz boryshyn óteýdi jáne oǵan qyzmet kórsetýdi jergilikti biýdjetterde kózdelgen qarajat esebinen ózderi júzege asyrady. Boryshtar fýtbol klýbtaryn biýdjetteý kezinde jyldyń basynda, sondai-aq demeýshiler tarapynan az qarjylandyrýǵa bailanysty paida bolady. Qazirgi ýaqytta jergilikti atqarýshy organdardyń aqparaty boiynsha fýtbolshylar men mamandar aldyndaǵy bereshek ótelgen», - dedi Asqar Mamin.
Úkimet basshysy fýtbol komandalarynyń biýdjetterin josparlaý men jumsaý jergilikti atqarýshy organdardyń quzyrynda bolǵandyqtan, fýtbol klýbtary qarajatty paidalaný boiynsha esepti jergilikti organdarǵa usynady.
«Baiandalǵannyń negizinde otandyq fýtboldy damytý tásilderin odan ári ázirleý, sheteldik mamandar men legionerlerdi tartý, fýtbol salasyn qarjylandyrýdy jetildirý maqsatynda Mádeniet jáne sport ministrligi Qazaqstandyq fýtbol federatsiiasymen birlesip tiisti jumys júrgizetin bolady jáne ótkizilgen is-sharalar qorytyndysy boiynsha Mádeniet jáne sport ministrligi depýtattyq korpýsty qosymsha habardar etedi», - dedi Premer-Ministr jaýabynda.
Aita keteiik, osy jyldyń 23 qańtarynda Májilistiń bir top depýtaty sol kezdegi Premer-ministr Baqytjan Saǵyntaevtyń atyna resmi saýal joldap, fýtbol komandalarynyń biýdjetterin josparlaý men jumsaýdyń negizdiligin tekserýdi, sondai-aq sheteldikter aldynda paida bolǵan bereshektiń sebepterin anyqtaýdy usynǵan bolatyn.
Depýtattardyń deregine sáikes, fýtbol klýbtarynyń oiynshylar aldyndaǵy jalpy qaryzy 9,9 mlrd teńgege jetken. Máselen, Aqmola oblysynyń klýby oiynshylarǵa 2,9 mlrd teńge, Aqtóbe oblysy klýby 1,08 mlrd teńge, Shymkent qalasynyń klýby 4,5 mlrd teńge bolǵan.
