QR Premer-Ministri Asqar Mamin Qyrǵyzstannyń Sholpan-Ata qalasynda Eýraziialyq úkimetaralyq keńes (EAÚK) otyrysyna qatysty, dep habarlaidy "Ult aqparat" primeminister.kz saityna silteme jasap.
EAÚK otyrysyna Resei Federatsiiasynyń Premer-Ministri D. Medvedev, Belarýs Premer-Ministri S. Rýmas, Armeniia Premer-Ministri N. Pashinian, Qyrǵyzstan Premer-Ministri M. Abylgaziev jáne Eýraziialyq ekonomikalyq komissiia alqasynyń tóraǵasy T. Sarkisian qatysty.
Is-shara bastalmas buryn delegatsiialardyń basshylary Qyrǵyzstan Prezidenti S. Jeenbekovpen kezdesti.
EAÚK otyrysynyń qatysýshylary integratsiialyq úderisterdi odan ári damytý, saýda-ekonomikalyq yntymaqtastyqty keńeitý, EAEO ishki naryǵyndaǵy kedergilerdi joiý boiynsha kún tártibiniń 15 máselesin qarady. Taraptar QR Tuńǵysh Prezidenti – Elbasy N. Á. Nazarbaev bastamashy bolǵan Eýraziialyq integratsiia ideiasynyń 25 jyldyǵy men Eýraziialyq ekonomikalyq odaq qurý týraly shartqa qol qoiylǵanyna 5 jyl tolýyn atap ótti.
Úkimetterdiń basshylary alkogol, qarjy naryǵyn retteý, EAEO aiasynda syrttan keletin kedendik bajdy bólý máseleleri boiynsha pikir almasty.
Transshekaralyq aqparattyq ózara is-qimyldyń, ónerkásiptik kooperatsiiany damytýdyń, Odaq elderiniń agroónerkásiptik kesheniniń tujyrymdamalyq máseleleri, sondai-aq Keden odaǵyna múshe memleketterdiń keden qyzmetteriniń yntymaqtastyǵy máseleleri talqylandy.
«Qazirgi ýaqytta EAEO týraly sharttyń erejelerin yntymaqtastyqtyń ózekti máseleleri boiynsha iske asyrý, 2025 jylǵa deiin Eýraziialyq ekonomikalyq integratsiiany damytýdyń strategiialyq baǵyttarynyń jobalaryn ázirleý boiynsha jumystar jalǵasyp jatyr», — dedi A. Mamin.
QR Premer-Ministriniń aitýynsha, álemdik ekonomikadaǵy qazirgi jaǵdaidy eskere otyryp, EAEO elderiniń ekonomikalarynyń ósimine oń áser berý úshin ónerkásiptik kooperatsiiany damytýǵa erekshe kóńil bólý qajet. Bul baǵyt EAEO-nyń ortaq kún tártibinde basty ekonomikalyq mindetterdiń birine ainalýy tiis.
Kásipkerlikti damytý, halyqty jumyspen qamtý jáne ekonomikalyq ósýdiń tiimdi quraldarynyń biri «qarapaiym zattar ekonomikasyn» damytýdyń birlesken baǵdarlamasy bolýy múmkin.
«Bul sektor jalpy ónimniń JIÓ-niń 1,5% deiin ósýine múmkindik bere alady», — degen A. Mamin, Odaq elderi boiynsha salalyq kásiporyndardy bólýdiń tsifrlyq kartasyn ázirleýdi usyndy.
Sonymen qatar, elektrondy saýda platformalaryn damytýdyń qajettigi atalyp ótti. Atalǵan perspektivaly álemdik trendti paidalaný ózara saýdanyń ósýine yqpal etip, úshinshi elderdiń naryqtaryna taýarlar eksportyn yntalandyrýǵa jol ashady.
QR Premer-Ministri EAEO-nyń halyqaralyq kólik jelisine integratsiialaný boiynsha joǵary áleýetin atap ótti. Odaq elderiniń aýmaǵy arqyly tranzit kezinde kedendik rásimderdi jeńildetý sharalarymen qatar, qazirgi ýaqytta ázirlenip jatqan EAEO biryńǵai tranzittik júiesi tiimdi qural bolýy kerek.
QR Úkimeti basshysynyń aitýynsha, qarjy naryqtary, qarjy qyzmetterin tutynýshylar men investorlardyń quqyqtary men qyzyǵýshylyqtaryn qorǵaý, saýda jáne investitsiialyq ózara is-qimyl salalarynda yntymaqtastyqty damytý qajet.
Osyǵan orai Astana halyqaralyq qarjy ortalyǵynyń múmkindikterin paidalaný usynyldy. AHQO aiasynda Qarjy tehnologiialarynyń haby quryldy, ol qarjylyq tehnologiialar naryǵynda barlyq óńirlik qatysýshylardy biriktirý úshin joǵary sapaly infraqurylymnyń qurylýyn qamtamasyz etedi. Hab qarjylyq tehnologiialar naryǵyna jańa ónimderdi engizýge jáne yntalandyrýǵa múmkindik beredi.
Osy saladaǵy yntymaqtastyqty jandandyrý maqsatynda EEK pen AHQO arasyndaǵy yntymaqtastyq týraly memorandým aiasynda Eýraziialyq ekonomikalyq komissiia men Astana halyqaralyq qarjy ortalyǵy arasyndaǵy 2019–2021 jyldarǵa arnalǵan birlesken is-sharalar josparyna qol qoiyldy.
Otyrystyń qorytyndysy boiynsha 12 qujatqa qol qoiyldy.
