Qazaqstan – Aziia men Eýropa arasyndaǵy tranzittik kópir. Bul týraly QR Premer-Ministri Asqar Maminniń Almatyda ashylǵan TransLogistica Kazakhstan-2021 halyqaralyq kórmesiniń qatysýshylaryna joldaǵan quttyqtaýynda aityldy, dep habarlaidy QazAqparat.
«Qazaqstan Eýraziia qurlyǵynyń mańyzdy kólik jelileriniń ortasynda ornalasa otyryp, Aziia men Eýropa arasyndaǵy tranzittik kópir men senimdi seriktesti bildiredi, muny kórme men konferentsiiaǵa qatysýshylardyń halyqaralyq quramy dáleldeidi.
«Translogistica Kazakhstan 2021» halyqaralyq kórmesi tranzittik-kólik áleýetin damytýǵa, uzaq merzimdi jáne ózara tiimdi seriktestik qatynastardy odan ári nyǵaitýǵa úles qosatynyna senimdimin», - dep Úkimet basshysynyń quttyqtaýyn oqyp berdi QR Indýstriia jáne infraqurylymdyq damý vitse-ministri Berik Kamaliev.
Vitse-ministr óz sózinde sońǵy 15 jylda Qazaqstannyń kólik salasyna 35 mlrd AQSh dollaryna jýyq qarajat salynǵanyn aityp ótti.
«Qazaqstan kólik salasyn jáne kólik dálizderiniń tranzittik áleýetin damytý úshin zor kúsh-jiger jumsaýda. Úkimet pen QR IIDM birqatar salalyq baǵdarlamalardy iske asyrdy, salanyń quqyqtyq negizi qalyptasty, kólik qyzmetterin kórsetý úshin qolaily básekelestik orta quryldy. Sońǵy 15 jylda elimizdiń kólik salasyna shamamen 35 mlrd AQSh dollary salyndy», - dep atap ótti ol.
Onyń aitýynsha, búginde Qazaqstan arqyly 11 halyqaralyq tranzittik dáliz ótedi (5 temir jol jáne 6 avto). Respýblikalyq, oblystyq jáne aýdandyq mańyzy bar avtomobil joldarynyń jalpy uzyndyǵy shamamen 100 myń km quraidy. Temir joldyń uzyndyǵy – 21 myń km.
Qazaqstanda 20 áýejai bar, onyń 18-i Azamattyq aviatsiianyń halyqaralyq uiymy (IKAO) talaptaryna sáikes keledi.
Aǵymdaǵy jylǵy 2-11 tamyz aralyǵynda ótkizilgen ICVM sheńberinde IKAO ushý qaýipsizdiginiń halyqaralyq standarttaryna sáikestik deńgeii (84% - ǵa deiin) arttyryldy. IKAO-nyń obektivti baǵalaýy QR IIDM júrgizetin reformalardyń oń áserin kórsetedi.
