QR Premer-Ministri Asqar Mamin Investitsiialyq ahýaldy jaqsartý jónindegi keńestiń otyrysyn ótkizdi, dep habarlaidy primeminister.kz.
QR Premer-Ministri Asqar Maminniń tóraǵalyǵymen ótken Investitsiialyq ahýaldy jaqsartý jónindegi keńestiń (IAJK) otyrysynda Qazaqstannyń Dúniejúzilik saýda uiymyna (DSU) múshelik etýi máseleleri qaraldy.
Qazaqstannyń DSU-ǵa músheliginiń jai-kúii men keleshegin baǵalaý jónindegi baiandamalarmen, sondai-aq, eldegi investitsiialyq ahýaldy jaqsartý jónindegi usynystarmen Qazaqstanda akkredittelgen AQSh elshisi Ý. Mozer, Ulybritaniia elshisi M. Gifford, Kanada elshisi N. Brýsso, Eýropalyq Odaq elshisi Sven-Olov Karlsson, DSU-daǵy Kanadanyń turaqty ókili S. Boer, AQSh saýda ókili kómekshisiniń orynbasary Z. Reiazýddin, «Shell Kazakhstan» vitse-prezidenti jáne eldik tóraǵasy O. Lazar, «OMV Petrom» basqarýshy direktory D. Barý, «Globalink» prezidenti S. Han, «Baker & MacKenzie» seriktesi A. Iorsh sóz sóiledi.
Úkimet basshysy 2050 jylǵa qarai álemniń asa damyǵan 30 eliniń qataryna kirý úshin JIÓ-niń jyl saiynǵy ósý qarqynyn 5% deńgeiinde qamtamasyz etý qajet ekenin, bul rette negizgi kapitalǵa salynǵan investitsiialar deńgeii 2024 jyly JIÓ-niń 30% deiin jetýi kerek ekenin atap ótti.
«Tikelei sheteldik investitsiialar – bul investitsiialardyń mańyzdy kózi. Osyǵan bailanysty Qazaqstan investitsiia tartý boiynsha proaktivti pozitsiiany ustanýy kerek», — dedi A. Mamin.
Premer-Ministr 2020 jylǵy maýsymda Nur-Sultan qalasynda DSU-nyń 12-shi Ministrler konferentsiiasyn ótkizý josparlanǵanyn aitty.
«Bul bizge Qazaqstannyń ekonomikalyq jáne investitsiialyq saiasatynyń ashyqtyǵyn kórsetýge jol ashady jáne elimizdiń kópjaqty saýda júiesine belsendi qatysýshy retindegi mártebesin rastaidy», — dep atap ótti A. Mamin.
Qazaqstan — 2015 jyldan bastap DSU-nyń resmi múshesi.
DSU-men ózara is-qimyl aiasynda Qazaqstanda valiýtalyq retteý, baǵa belgileý jáne básekelestikti damytý, salyq saiasaty, kedendik retteý, importty litsenziialaý, ziiatkerlik menshik quqyǵyn qorǵaý, ónimniń qaýipsizdigin qamtamasyz etý salasyndaǵy birqatar zańnamalyq aktiler jetildirildi, sonyń ishinde tehnikalyq retteý, sanitarlyq jáne veterinarlyq sipattaǵy sharalardy qabyldaý arqyly júzege asyryldy.
Qazaqstandaǵy biznes júrgizý rásimderin jeńildetý jáne investitsiialyq ahýaldy jaqsartý maqsatynda 50-den astam zańnamalyq aktilerge ózgerister engizildi. Osy jyldyń maýsym aiynda Qazaqstan Respýblikasynyń Saýda jáne integratsiia ministrligi quryldy, ol DSU-men ózara is-qimyl máselelerin ilgeriletýdi qosa alǵanda, elimizdiń ishki jáne syrtqy saýda saiasatyn qalyptastyrýǵa jáne júzege asyrýǵa baǵyttalǵan.
