QR Premer-Ministri Asqar Mamin Eýropa qaita qurý jáne damý bankiniń (EQDB) prezidenti Odil Reno-Bassomen kelissóz júrgizdi. Bul týraly Úkimettiń saity habarlady.
«Qazaqstanda EQDB qyzmeti kezeńinde ekonomikanyń qarjy, infraqurylym, TKSh, energetika, shaǵyn jáne orta biznes, aýyl sharýashylyǵy jáne AT siiaqty basym salalarynda jalpy somasy $10 mlrd-tan astam 300-ge jýyq joba qarjylandyryldy. 2021 jyldyń qorytyndysy boiynsha jalpy kólemi $600 mln bolatyn birlesken jobalardy iske asyrý jóninde kelisimderge qol qoiylady», — dedi A. Mamin.
Taraptar biylǵy naýryzda qol qoiylǵan QR Úkimeti men EQDB arasyndaǵy eldiń turaqty damýy men ósýine járdemdesýge baǵyttalǵan yntymaqtastyqty keńeitý jónindegi áriptestik týraly negizdemelik kelisimniń iske asyrylý barysyn talqylady.
EQDB-nyń infraqurylymdy damytýǵa qatysýyn odan ári keńeitý, Qazaqstannyń energetikalyq sektoryn dekarbonizatsiialaý baǵdarlamasyn, EQDB-nyń «Jasyl qalalar» jobalaryn iske asyrý, kárizdik tazartý qurylystaryn jańǵyrtý, sondai-aq shaǵyn jáne orta biznesti qoldaý máseleleri qaraldy.
Úlken Almaty ainalma avtomobil jolyn (ÚAAAJ), Almaty qalasyndaǵy S. J. Asfendiiarov atyndaǵy aýrýhanany jáne memlekettik-jekeshelik áriptestik sheńberinde densaýlyq saqtaýdyń basqa da obektilerin salý jobalaryna erekshe nazar aýdaryldy.
Kelissóz qorytyndysy boiynsha Almaty qalasynyń áýejaiyn jańǵyrtý jáne keńeitý, «Qyzylorda – Jezqazǵan» avtomobil jolyn rekonstrýktsiialaý jobalary boiynsha yntymaqtastyq týraly kelisimderge qol qoiyldy.
Kezdesýge Premer-Ministrdiń birinshi orynbasary Álihan Smaiylov, ulttyq ekonomika ministri Áset Erǵaliev, indýstriia jáne infraqurylymdyq damý ministri Beibit Atamqulov, qarjy ministri Erulan Jamaýbaev, ekologiia, geologiia jáne tabiǵi resýrstar ministri Serikqali Brekeshev, densaýlyq saqtaý ministri Aleksei Tsoi, energetika birinshi vitse-ministri Murat Júrebekov qatysty.
