QR Premer-Ministri Asqar Mamin «Shevron» (Chevron) kompaniiasynyń óndirý máseleleri jónindegi vitse-prezidenti Djeims Djonsonmen kelissóz júrgizdi, dep habarlaidy "Ult aqparat" primeminister.kz saityna silteme jasap.
Taraptar «Teńizshevroil» (TShO) bolashaq keńeitý jobasyn iske asyrý, Qarashyǵanaq jobasyn keńeitý jáne Kaspii qubyr konsortsiýmynyń qýatyn arttyrý perspektivasy máselelerin talqylady.
Zamanaýi ekologiialyq taza tehnologiialardy qoldaný, áleýmettik jobalardy iske asyrý, densaýlyq saqtaý jáne eńbek qaýipsizdigi salasynda joǵary standarttardyń saqtalýyn qamtamasyz etý máseleleri qaraldy.
«Shevron» úsh iri jobada – Teńiz (50%), Qarashyǵanaq (18%) jáne Kaspii qubyr konsortsiýmy (15%) jobalarynda aktivteri bar Qazaqstandaǵy asa iri sheteldik investor. 2020 jyly TShO-da shiki munai óndirý kólemi 26,5 mln tonnany qurady. Memleketke $6,6 mlrd kóleminde tikelei qarjylyq tólemder júzege asyryldy, $3,5 mlrd astam somaǵa qazaqstandyq jetkizýshilerdiń taýarlary men qyzmetteri satyp alyndy.
Biyl TShO-da 26,3 mln tonna kóleminde munai óndirý josparlanýda. 2021 jyldyń 8 aiynda memleketke tólemder $4,9 mlrd qurady. Bolashaq keńeitý jobasynyń aiaqtalýy 2023 jyldyń sońynda óndirý kólemin jylyna 12 mln tonnaǵa arttyrýǵa múmkindik beredi. TShO gazy Atyraý oblysynda polipropilen (qýaty jylyna 500 myń tonna) jáne polietilen (jylyna 1,25 mln tonna) óndiretin eki iri gaz-himiia jobasy úshin shikizat bolyp otyr.
Kelissóz qorytyndysy boiynsha QR Energetika ministrligi men «Shevron» kompaniiasy arasynda Qazaqstanda $248,5 mln kóleminde Tikelei investitsiialar qoryn qurý boiynsha ózara túsinistik týraly memorandýmǵa qol qoiyldy.
Memorandým Qazaqstannyń munai-gaz salasyndaǵy, qorshaǵan ortany qorǵaý, sondai-aq aqparattyq jáne tsifrlyq tehnologiialar salasyndaǵy taýar óndirý, jumystardy oryndaý jáne qyzmetterdi usyný jónindegi kommertsiialyq kásiporyndarǵa investitsiia salý jolymen ekonomikany jáne jergilikti qamtýdy damytý úshin qor qurýdy kózdeidi.
Qor kapitalyn «Shevron»-nyń Qazaqstanda alǵan paidasynyń bir bóligi quraidy. Kezdesýge energetika ministri Maǵzum Myrzaǵaliev jáne «QazMunaiGaz» UK» AQ basqarma tóraǵasy Alik Aidarbaev qatysty.
