Batys Qazaqstan oblysynda turǵyn úi qurylysynyń qarqyny tómen. Bul týraly búgin «Nurly jer» baǵdarlamasynyń iske asyrylýy qaralǵan Úkimet otyrysynda Premer-Ministr Asqar Mamin aitty, dep habarlaidy QazAqparat tilshisi.
«Altai Seidinuly, sizderde de turǵyn úige salynatyn investitsiia kólemi 55 paiyzǵa azaiǵan. Osy jyldyń eki aiynyń nátijesi boiynsha 30 myń sharshy metr baspana paidalanýǵa berildi. Bul kórsetkish ótken jyldyń osyndai kezeńimen salystyrǵanda 40 paiyzǵa az», - dedi Úkimet basshysy Batys Qazaqstan oblysynyń ákimi Kólginovke qarata.
Oblys basshysynyń aitýynsha, biyl «Nurly jer» baǵdarlamasy aiasynda 20 kóppáterli turǵyn úi, iaǵni 2 704 páter jáne aýyldarda 440 páterli 70 turǵyn úidiń qurylysy júrip jatyr. Osy maqsatqa 11,1 mlrd teńge kóleminde qarajat qarastyrylǵan. Onyń ishinde turǵyn úi qurylysyna 8,7 mlrd teńge jáne injenerlik kommýnikatsiia júrgizýge 2,4 mlrd teńge bólingen. 2 aidyń qorytyndysy boiynsha qarajattyń igerilýi - 100 paiyz.
«2018 jyly 430 myń sharshy metr el igiligine berilse, biyl 450 myń sharshy metr dep josparlap otyrmyz. Qurylys jumystarynyń naqty kólem indeksi 2 aidyń qorytyndysy boiynsha 109,5 paiyzdy qurady. Turǵyn úidi paidalanýǵa berý ótken jylǵy kezeńmen salystyrǵanda 40 paiyzǵa tómendedi. Ol ras. Az bolýy biylǵy aýa raiynyń qolaisyzdyǵyna bailanysty. 2 aida qalyń qar jaýyp, boran soqty. Naýryz aiynda aýa raiy jaqsardy, qurylys qarqyny qalpyna keldi. Josparlanǵan qurylys kólemi - 1-toqsan qorytynysy boiynsha 130 myń sharshy metr, iaǵni, 100 paiyz deńgeige jetemiz degen boljam bar», - dedi Altai Kólginov.
Osy oraida Úkimet basshysy oblys boiynsha «7-20-25» baǵdarlamasy boiynsha nebári 181 jeńildetilgen kredit maquldanǵanyn aitty.
«Bul - respýblikalyq kórsetkishtiń 3 paiyzy ǵana», - dedi Premer-Ministr.
Óz kezeginde BQO ákimi Úkimet basshysynyń barlyq tapsyrmasy oryndalatynyn aityp sendirdi.
«Qazirgi ýaqytta «7-20-25» baǵdarlamasymen 2 mlrd teńgege 180 páter tapsyrylǵan. Bul jumys toqtaǵan joq. Aldaǵy ýaqytta jumys qarqynyn kúsheitemiz. Suranys bar, úiler salynyp jatyr, oryndaimyz», - dedi ol.
