Qyrǵyzstannyń burynǵy prezidenti Asqar Aqaev Bishkekke jetkizildi. Bul týraly Qyrǵyz Respýblikasy Ulttyq qaýipsizdik memlekettik komitetiniń (UQMK) baspasóz qyzmeti málim etti, dep habarlaidy Kabar agenttigi.
Buǵan deiin habarlanǵandai, «Qumtór» jobasyn iske asyrý kezindegi sybailas jemqorlyq faktileri boiynsha eldiń burynǵy prezidenti Asqar Aqaevqa izdeý jariialanǵan bolatyn.
«Aqaev ózge joǵary laýazymdy sheneýniktermen qatar 1992 jyly «Qumtór» jobasy boiynsha Bas kelisim jasaý, 1994 jyly oǵan ózgerister engizý, sondai-aq 2003 jyly «Kameko» kompaniiasymen Bas kelisimdi qaita qurylymdaý kezindegi sybailas jemqorlyq faktisi boiynsha qylmystyq jaýapqa tartyldy.
Osylaisha, Aqaevtyń prezidenttigi kezeńinde «Qumtór» jobasyn iske asyrýdaǵy jemqorlyqqa qatysy bar barlyq kináli tulǵaǵa quqyqtyq baǵa berildi.
Sonymen qatar Qyrǵyz Respýblikasynyń UQMK-men birlesken tergeý barysynda A.Aqaevty respýblika aýmaǵyna jetkizý jolymen ony qylmystyq jaýaptylyqqa tartý bóliginde tarihi ádilettilikti qalpyna keltirýge baǵyttalǵan belsendi jumys júrgizildi.
Solai, UQMK qabyldaǵan sharalar nátijesinde 2021 jylǵy 2 tamyzda burynǵy prezident Asqar Aqaev Bishkek qalasyna jetkizilip, keiin dereý Vedomstvoaralyq tergeý tobyna berildi.
Aqaev UQMK ǵimaratynda. Onda onyń qatysýymen «Qumtór» ken orny boiynsha qylmystyq is sheńberinde qajetti tergeý áreketteri júrgiziledi.
Júrgizilgen tergeý áreketteriniń nátijeleri jáne ol boiynsha, onyń ishinde A.Aqaevqa qatysty qabyldanǵan protsessýaldyq sheshimder týraly UQMK jurtshylyqty qosymsha habardar etetin bolady», - delingen UQK habarlamasynda.
Eske sala keteiik, 2005 jyldyń naýryz aiyndaǵy tóńkeristen keiin A.Aqaev Reseige qashyp ketken bolatyn jáne osy kúnge deiin sonda boldy.
Eks-premer Feliks Kýlovtyń aitýynsha, Asqar Aqaev Bishkekke "Qumtór" jobasyna qatysty qylmystyq iske bailanysty aiǵaq berýge ózi kelgen. Ol tergeý mamandarymen jumys isteýge daiyn.
"Sadyr Japarov jomarttyq tanytyp, burynǵy prezidentke kelýge múmkindik berdi. Meniń bilýimshe, Asqar Aqaevty eshkim májbúrlegen joq, Bishkekke kelgennen keiin ol UQKU-ǵa bardy", - dedi Kýlov.
