Qyrǵyzstannyń birinshi prezidenti Asqar Aqaev Máskeýge oralǵan soń "Moskovskii Komsomolets" basylymyna suhbat berdi. Ol týǵan elinde ózine qozǵalǵan barlyq istiń jabylǵanyn aitty, dep habarlaidy Azattyq.
"Endi kez kelgen Qyrǵyzstan azamaty siiaqty ol jaqqa qalaǵan ýaqytymda bara alamyn. Árine, bul jerde qazirgi prezident Sadyr Japarov basty ról atqardy. Ol jeke ózime habarlasyp, 16 jyl ishinde meniń ústimnen kóp is qozǵalǵanyn, kóbi oidan qurastyrylǵanyn, biraq olardy jabý úshin jaýap berýim qajet ekenin aitty" dedi Aqaev.
Sonymen qatar onyń sapary prezident Sadyr Japarov pen Resei basshysy Vladimir Pýtinmen kelisilgenin habarlady.
Onyń sózine qaraǵanda, "2005 jyly [Qurmanbek] Bakiev, [Almazbek] Atambaev jáne [Roza] Otynbaeva bastaǵan top Qyrǵyzstanda memlekettik tóńkeris jasaǵan". Artynsha árqaisysy kezek-kezegimen prezident bolyp, moinyna qandai da bir isti ilmek bolǵan. Al Bas prokýratýra kóptegen aiyptyń oidan shyǵarylǵanyn moiyndaǵan. Asqar Aqaevtyń pikirinshe, tek Sadyr Japarov qana máseleni "ádil qaraǵan".
Birinshi prezident sonymen birge ázirge Qyrǵyzstanǵa oralýǵa daiyn emes ekenin, Máskeý memlekettik ýniversitetindegi qyzmetin jalǵastyratynyn aitqan.
Asqar Aqaev Bishkekke 14 jeltoqsanda kelgen. 20 jeltoqsanda onyń "Qumtór isi" boiynsha jaýap bergennen keiin Máskeýge ushyp ketkeni belgili boldy. Onyń áriptesi Bekbolat Talǵarbekov tergeý organdary oǵan taǵylǵan aiyptardyń barlyǵyn alyp tastaǵanyn habarlady. Qyrǵyzstan ulttyq qaýipsizdik jónindegi memlekettik komiteti buǵan bailanysty túsinikteme bermedi.
Aqaev keiingi 6 aida Qyrǵyzstanǵa eki ret keldi. Alǵash ret tamyz aiynda kelip, Qyrǵyzstan memlekettik ulttyq qaýipsizdik komitetiniń "Qumtór isi" boiynsha suraqtaryna jaýap bergen. Buryn ol "Qumtór" altyn kenishin satý kezinde jemqorlyqqa aralasty" degen aiyppen izdeýde bolǵan.
Burynǵy premer-ministrler Tursynbek Chynǵyshev, Apas Jumaǵulov jáne "Qyrǵyzaltyn" memlekettik kontserniniń burynǵy prezidenti Dastan Saryǵulov "Qumtór" kenishi boiynsha bas kelisimge kelip, 1994 jyly ózgertkende jemqorlyq jasady" degen aiyppen syrttai qylmystyq jaýapqa tartylǵan.
Asqar Aqaev 1990 jyldan 2005 jylǵa deiin Qyrǵyzstan prezidenti boldy. 2005 jyly 24 naýryzda Qyrǵyzstanda halyq tolqýy bolyp, sonyń nátijesinde elden ketýge májbúr bolǵan. Otbasymen birge Reseige qashqan Aqaev sol jaqtan saiasi baspana aldy.
Qumtór – Qyrǵyzstandaǵy eń iri altyn kenishi. Odan túsken kiris el ekonomikasynyń shamamen 9 paiyzyn quraidy. Qyrǵyzstannyń qazirgi basshylyǵy burynǵy bilik tusynda kenish ainalasynda jemqorlyqpen kelisim-shart jasalǵan dep sanaidy. Burynǵy sheneýnikter men kenishti igerýmen ainalysqan kanadalyq Centerra Gold kompaniiasy muny joqqa shyǵarady.
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036.
