Qazaqstannyń depozitterge kepildik berý qory alǵashqy aptada «AsiaCredit Bank» AQ salymshylaryna kepildik berilgen ótemniń 70% jýyǵyn tóledi, dep habarlaidy "Ult aqparat".
2021 jyldyń 3 naýryzynadaǵy jaǵdai boiynsha «AsiaCredit Bank (AziiaKredit Bank)» AQ 2 511 salymshysy jalpy somasy 13,12 mlrd teńgege kepildik berilgen ótem aldy.
Bul - Qazaqstannyń depozitterge kepildik berý qory mindettemeleriniń jalpy somasynyń 68,7 paiyzy.
«Agent bank retinde tańdap alynǵan «Eýraziialyq bank» AQ arqyly «AsiaCredit Bank (AziiaKredit Bank)» salymshylaryna kepildik ótem tóleý 24 aqpanda bastalǵan bolatyn. Ol 1 mamyrǵa deiin jalǵasady» dep habarlady qordyń baspasóz qyzmeti.
Salymshylar kepildik berilgen ótemdi ózderine yńǵaily tásilmen: agent banktiń kassasynan qolma-qol aqshamen, sol agent bankte bank shotyn (kartochka) ashý nemese kez kelgen basqa bankke aýdarý arqyly ala alady.
Depozit boiynsha kepildikter jáne kepildik berilgen ótemdi tóleý týraly jalpy aqparattar qordyń www.kdif.kz saitynda jariialanǵan.
Salymshylar aqyl-keńes alý úshin 1460 telefon nómiri, sondai-aq QDKBQ saityndaǵy chat, @kdif_ask Telegram-chaty, qordyń Facebook jáne Instagram áleýmettik jelilerindegi deposit.kz resmi paraqshalary, sondai-aq info@kdif.kz elektrondy poshtasyna habarlasa alady.
Eske salaiyq, Qarjy naryǵyn retteý jáne damytý agenttigi basqarmasynyń 11 aqpandaǵy qaýlysyna sáikes «AsiaCredit Bank» AQ baǵaly qaǵazdar naryǵynda qyzmetti júrgizý litsenziiasynan aiyrylǵan bolatyn.
