Bir aptanyń ishinde 5 myńǵa jýyq kásipker «Ashyq» jobasyna qatysýǵa ótinish beretin bolady. Bul týraly Úkimet otyrysynda «Atameken» Ulttyq kásipkerler palatasynyń basqarma tóraǵasy Abylai Myrzahmetov aitty, dep habarlaidy QazAqparat.
«Keshegi málimetke qaraǵanda «Ashyq» jobasyna 1658 kásipkerlik sýbektisi qatysyp otyr. Taǵy qosymsha 670 ótinish kelip tústi. Úkimet sheshimimen kesheden bastap bul joba elimizdiń barlyq óńirine taratyldy. Bizdiń esebimiz boiynsha 1 aptanyń ishinde 5 myńǵa jýyq kásipker jobaǵa qatysýǵa ótinish beretin bolady», - dedi Abylai Myrzahmetov.
Onyń atap ótýinshe, joba Almaty, Nur-Sultan, Qaraǵandy, Taldyqorǵan, Aqtóbe, Taraz qalalarynda jaqsy damyp jatyr.
«Ashyq» jobasyna qyzyǵýshylyq tanytqan barlyq kásipker mobildik qosymsha arqyly ony qalai engizýge bolatyndyǵyna qatysty algoritmmen tanys bola alady. Iaǵni, kásipkerler kúndelikti aqparat alyp otyr. Qyzyǵýshylyq óte joǵary. Shekteý sharalary kezinde kinoteatrlar jumysy toqtap qalǵan edi. Búginde jobanyń arqasynda 48 óńirde kinoteatrlar jumysyn bastady», - dedi ol.
Sonymen qatar ol balalar demalys lagerleri, balalar saýyqtyrý ortalyqtary, kórmeler, úlken saýda ortalyqtaryndaǵy fýd-kordtar, joǵary oqý oryndary «Ashyq» jobasyna qatysýǵa daiyn ekendigin jáne olarǵa da ruqsat berý qajettigin atap ótti.
