Osy jyldyń sońyna deiin tartylǵan investitsiia kólemi joǵarylaidy. Bul týraly QR SIM Investitsiialar jónindegi komitet tóraǵasynyń orynbasary Larisa Jumaǵalieva aitty, dep habarlaidy QazAqparat.
«Jalpy, Qazaqstanda sheteldik investitsiiany tartýǵa, sondai-aq kelgen investorlardy ustap qalýǵa, jergilikti investorlardy yntalandyrýǵa kóptegen sharalar qabyldandy. Elimizdi jahandyq ekonomikadan tys qaraýǵa bolmaidy. Aita ketý kerek, sońǵy eki jylda jahandyq ekonomikany qaraityn bolsaq, salynǵan investitsiialardyń kólemi tómendedi. Bizdegi jaǵdaiǵa toqtalsaq, byltyr odan arǵy jylmen salystyrǵanda, investitsiia15,8 paiyzǵa artty. Al biyldyń jartyjyldyǵynda sál tómendeý baiqalady, biraq 2019 jyldyń aiaǵyna deiin kórsetkish joǵarylaidy degen úmittemiz», - dedi L. Jumaǵalieva «Qazaqstan» ulttyq arnasyndadaǵy «Ashyq alań» qoǵamdyq-saiasi tok-shoýynda.
Osy oraida, ol 2017 jyly Úkimet ulttyq investitsiialyq strategiiany qabyldaǵanyn eske saldy. Sol qujatta investorlar tartý aimaqtary, bul baǵytta iske asyrylatyn tásilder qamtylǵan. Bul turǵyda Ulttyq investitsiialyq strategiianyń aiqyndalýynan jáne basqa da oń qadamdardyń nátijesinde elimizge investitsiialar aǵyny tolastamady.
Óz kezeginde QR Parlamenti Májilisiniń depýtaty Sapar Ahmetov ótken jyldarda jalpy Qazaqstanǵa 330 mlrd AQSh dollary kóleminde tikelei investitsiia tartylǵanyn atap ótti.
«Investitsiia tartý árbir elge mańyzdy. Óitkeni naryqtar ashyq bolyp otyr. Memleketter arasynda taýar ainalymy men saýda bolmasa, tehnologiialar jetkizilmese, onda damý qarqynyn údetý qiynǵa túsedi. Osy jyldardyń ishinde biz tek qarjyny ǵana emes, sonymen qatar jańa tehnologiialardy alyp keldik. Bul turǵyda jańa zaýyttar da iske qosylyp, óndiris quraldary jetkizildi. Sondyqtan bul jyldar bosqa ketti dep aitýǵa bolmaidy», - dedi S. Ahmetov.
Depýttyń aitýynsha, investitsiialardyń basym bóligi taý-ken, munai-gaz salasyna baǵyttaldy.
«Bul baǵyttardy damytyp, sonyń arqasynda birqatar jumystar iske asyryldy. Máselen, infraqurylymdyq jobalar, jol salý, energetikalyq sala jetildirildi», - dedi Sapar Ahmetov.
