Búgin Aqparat jáne qoǵamdyq damý ministri Aida Balaevanyń tóraǵalyǵymen aqparatqa qol jetkizý máseleleri jónindegi komissiianyń kezekti otyrysy ótti, dep habarlaidy QazAqparat.
«Bizdiń ministrligimiz ashyqtyq printsipin ustanǵandyqtan, komissiia otyrysy Facebook jelisinde tikelei efirde beriledi. Jalpy, búgingi otyrysqa komissiianyń 18 múshesiniń 16-sy qatysyp otyr. Otyrys barysynda tórt másele qaralady», - dedi ministr.
Otyrysta «Ashyq úkimet» portaldaryn tanymal etý jáne damytý jónindegi sharalar týraly aqparat tyńdaldy.
A. Balaevanyń aitýynsha, bul saladaǵy bastamalardy jetildirý kerek.
«Ózderińiz kórip otyrsyzdar, «Ashyq úkimet» portaldarynyń jumysyna halyqtyń qatysýy tómen, ony moiyndaýymyz qajet. Tek basshylardyń blok-platformalaryna kelip túsken ótinishterdiń sany 27 myńnan 37 myńǵa deiin ósken. Ol da bolsa barlyq basshylarǵa qatysty dep aita almaimyz. Basty sebep nede? Eń aldymen, osy portaldardyń tehnikalyq kemshilikteri men zańnamalyq olqylyqtary dep bilemin. Sondyqtan bul qadamdardy jetildirýimiz kerek, qazir jaqsy usynystar túsip jatyr. Qoǵamdyq institýttar da bizben tyǵyz qatynasta jumys isteýge daiyn. Osy oraida birinshi kezekte ózimizge tikelei táýeldi suraqtardy sheshýimiz qajet. Ekinshiden, halyqtyń tsifrlyq saýattylyǵyn kóterýge barynsha atsalysýymyz kerek. Bul turǵyda jan-jaqty aqparattyq túsindirý jumystaryn jetildirýdiń qajettigi bar dep sanaimyn. Oǵan bizdiń ministrlik óz tarapynan atsalysýǵa daiyn», - dedi vedomstvo basshysy.
Budan bólek, jiyn barysynda jeke derekterdi qorǵaý máselesi de talqylandy. Sonymen qatar, otyrysta Qazaqstan Respýblikasynyń salalyq zańnamasyn onyń aqparatqa qol jetkizý salasyndaǵy talaptarǵa, standarttar men qaǵidattarǵa sáikestigi turǵysynan tekserý qorytyndylary qaraldy.
A. Balaeva jasalǵan usynystardy tyńdai kele, elimizde qoǵamdyq baqylaý týraly zań jobasy daiyndalyp jatqanyn aitty.
«Aqparat ministrligi qoǵamdyq baqylaý týraly zań jobasy boiynsha jumysqa kirisedi. Bul baǵytta Memleket basshysynyń naqty tapsyrmasy boldy. Sondyqtan biz jumys tobyn qurýdamyz, zań jobasyndaǵy tiisti normalardy azamattyq qoǵam institýttarymen belsendi talqylaityn bolamyz. Jalpy, búgingi komissiia otyrysyna engizilgen barlyq taqyryptar talqylandy. Olar boiynsha tiisti sheshimderdi birlese qabyldaimyz», - dedi ministr.
Aita keteiik, Tsifrlyq damý, innovatsiialar jáne aeroǵarysh ónerkásibi ministrligi Aqparattyq qaýipsizdik komitetiniń tóraǵasy Rýslan Ábdihalyqov jáne Ishki ister ministriniń orynbasary Sáken Sársenov jeke derekterdi qorǵaý boiynsha qabyldanyp jatqan sharalar jaiynda baiandady.
