Elimizde iri kásiporyndarǵa beriletin salyqtyq jeńildikterdi jan-jaqty zerdeleý qajet. Bul týraly Senat tóraǵasy Máýlen Áshimbaev aitty, dep habarlaidy QazAqparat tilshisi.
«Úkimet úlken jumys jasap jatyr. Bul jumystardyń barlyǵyn depýtattar qoldaidy. Sondai-aq osy jumystardyń aiasynda aldaǵy ýaqytta salyqtyq jeńildikterdi de bir saraptap qoiǵan artyq bolmaityn shyǵar dep esepteimiz. Jalpy, bizdiń qolymyzdaǵy aqparatqa sáikes, 2020 jyly salyqtyq jeńildikterge bailanysty biýdjet túsimi 4,8 trln teńgeden astam somaǵa kem boldy. Ol úlken soma. Negizgi salyqtyq jeńildikter shaǵyn kásiporyndarǵa emes, úlken kásiporyndarǵa berilip jatqany belgili», - dedi ol Senattyń jalpy otyrysynda.
Senat spikeriniń dereginshe, osy jeńildikterdiń 40 paiyzy qarjy jáne taý-ken óndirý salasyndaǵy kásiporyndarǵa tiesili bolyp otyr.
«Bul rette salyqtyq jeńildikterden bas tartaiyq degen áńgime joq. Ol halyqaralyq tájiribe. Ony qoldanýymyz kerek, osy baǵytta jumys isteýimiz kerek. Degenmen osy jeńildikter memleketimizge ne berip jatyr? Ekonomikamyzǵa qandai áserin tigizedi? Sony da bir saraptap qoiǵan artyq bolmas. Osy jyldyń basynda Prezidentimiz Salyq kodeksine túgendeý jasaý kerektigin kótergen bolatyn. Osy jumystyń aiasynda salyqtyq jeńildikterdi de jan-jaqty zerdeleisizder dep senemiz. Sol jumystyń qorytyndysy boiynsha Parlamentke aqparat beresizder dep úmittenemiz»,- dedi Máýlen Áshimbaev.
