Senat Spikeri Máýlen Áshimbaevtyń tóraǵalyǵymen Palata Biýrosynyń otyrysy ótti. Onda depýtattar 2021 jylǵy 23 qyrkúiek kúni ótetin Senat otyrysynyń kún tártibin bekitti, dep habarlaidy "Ult aqparat".
«Soǵan sáikes aldaǵy Senat otyrysynda «Kaspii teńiziniń teńiz ortasyn qorǵaý jónindegi negizdemelik konventsiiaǵa qorshaǵan ortaǵa transshekaralyq turǵydan jasalatyn áserdi baǵalaý jónindegi hattamany ratifikatsiialaý týraly» zań jobasy qaralady. Atalǵan Hattamany ratifikatsiialaý qorshaǵan ortaǵa transshekaralyq turǵydan jasalatyn áserdi baǵalaý jónindegi hattamanyń erejelerin oryndaý úshin zańnamalyq, ákimshilik nemese basqa da sharalar qabyldaýǵa múmkindik beredi. Bul teńiz ortasy men qurlyqtyń lastanýyn boldyrmaý, azaitý jáne baqylaý turǵysynan mańyzdy. Mundai qadam teńizdiń bioalýantúrliligin saqtaýǵa, onyń tabiǵi resýrstaryn utymdy paidalanýǵa jáne adam densaýlyǵyn qorǵaýǵa yqpal etedi», - delingen Senat baspasóz qyzmetiniń málimetinde.
Sonymen qatar aldaǵy beisenbide senatorlar «Qazaqstan Respýblikasynyń keibir zańnamalyq aktilerine azamattardyń jekelegen sanattaryn áleýmettik qorǵaý máseleleri boiynsha ózgerister men tolyqtyrýlar engizý týraly» zań jobasyn ekinshi oqylymda qaraidy.
Odan bólek, Biýro otyrysynda Palata komitetteriniń tóraǵalary senatorlardyń zań jobalaryna bastamashylyq jasaýyna qatysty atqarylyp jatqan jumystar jóninde esep berdi.
«Ótken sessiiada Senat depýtattary belsendilik tanytyp, 7 zań jobasyna bastamashylyq jasady. Jańa sessiiada bul jumystyń qarqyny ulǵaia túspek. Osy sessiiada senatorlar 16 zań jobasy boiynsha bastamashylyq jumysty bastap ketti. Memleket basshysynyń tapsyrmasyna sáikes, adam quqyqtary jónindegi ýákil týraly zań jobasy men oǵan ilespe zań jobalaryn, Salyq kodeksine ózgerister men tolyqtyrýlar engizý týraly jáne ǵylym máseleleri jónindegi zań jobalaryn jyl sońyna deiin qabyldaýymyz kerek», – dedi Máýlen Áshimbaev.
Senatorlardyń bastamashyl bolýymen daiyndalatyn normalardyń qatarynda múgedektigi bar azamattardyń ómir súrý sapasyn jaqsartý máseleleri týraly zań jobasyn da atap ótken jón. Sol arqyly múgedekti bar bala tárbielep otyrǵan otbasylardyń erekshe mártebesin zańmen bekitý jáne olardyń turǵyn úi jaǵdaiyn jaqsartý múmkindikterin keńeitý kózdelip otyr. Memleket basshysynyń tapsyrmasy boiynsha jaiylym jerlerdi paidalaný máseleleri týraly bastamashylyq zań jobasy jaiylym tapshylyǵyna bailanysty qalyptasqan jaǵdaidy jaqsartýǵa jáne aýyl sharýashylyǵynyń ózekti problemalaryn sheshýge arnalady. Sonymen birge, senatorlar organikalyq ónim óndirý jáne onyń ainalymy, esirtki quraldary men jańa sintetikalyq zattardyń zańsyz ainalymyna qarsy kúresti kúsheitý jáne taǵy basqa mańyzdy máseleler boiynsha zań jobalaryn ázirlep jatyr.
Otyrys barysynda senatorlar bastamashylyq etetin zań jobalarynyń bári halyqty tolǵandyrǵan mańyzdy máselelerdi sheshýge jáne zańnamadaǵy keibir olqylyqtardy jetildirýge arnalǵan elimiz ben qoǵamymyz úshin qajetti normalar ekeni aityldy.
Sondai-aq, Senat Biýrosynyń músheleri TMD-nyń Parlamentaralyq Assambleiasyndaǵy Qazaqstan Parlamentiniń ókiletti ókili laýazymyna Igor Musalimovtyń kandidatýrasyn qarap, bekitti.
Budan basqa, otyrysta Májilisten kelip túsken «Qazaqstan Respýblikasynyń keibir zańnamalyq aktilerine memlekettik basqarý deńgeileri arasynda ókilettikterdi qaita bólý máseleleri boiynsha ózgerister men tolyqtyrýlar engizý týraly» zań jobasy jumys úshin Senattyń Ekonomikalyq saiasat, innovatsiialyq damý jáne kásipkerlik komitetine berildi.
