Parlament Senatynyń tóraǵasy Máýlen Áshimbaev senatorlardyń aldaǵy ýaqyttaǵy negizgi jumystaryn belgiledi, dep habarlaidy QazAqparat.
«Prezident biylǵy Joldaýynda jańa jaǵdaidaǵy barlyq is-qimylymyzdy naqty belgilip berdi. Bul basymdyqtardy iske asyrý úshin Parlamentke úlken mindet júktelip otyr. Sebebi, biz Memleket basshysynyń ár bastamasyn sapaly zańdarmen qamtamasyz etýimiz kerek. Qasym-Jomart Kemeluly Joldaýda aldaǵy ýaqytta naqty qandai zańdar qabyldanýy tiis ekenin de kórsetip berdi. Soǵan sáikes, memlekettik qyzmet týraly zańnamaǵa tiisti túzetýler engiziletin boldy. Bul memlekettik basqarýdyń jańa úlgisin qalyptastyrý úshin asa mańyzdy. Qazirgi kezde osy baǵytqa tyń serpin kerek ekenin bárimiz kórip otyrmyz», - dedi M. Áshimbaev Senattyń jalpy otyrysynda.
Osy oraida ol senatorlardy bul jumysqa belsene atsalysýǵa shaqyrdy.
«Sondai-aq, Memleket basshysy jańa ulttyq indýstriany damytýǵa arnalǵan jańǵyrtylǵan zańnamalyq negiz daiyndaýdy jáne jyl sońyna deiin ónerkásip saiasaty týraly zańdy ázirleýdi tapsyrdy. Munyń bári turaqty ekonomikalyq ósimdi qamtamasmyz etýge baǵyttalǵan bastamalar ekeni anyq. Kvazimemlekettik sektordyń barlyq satyp alý jumystaryn retteitin birtutas zańdy da jyl sońyna deiin qabyldaý mindeti qoiylyp otyr. Shyn máninde bul salada másele az emes. Sonyń bárin zańmen rettep, satyp alýlardyń ashyq, ádil júrgizilýin qamtamasyz etken jón. Osy jumysqa Senat depýtattary ózderiniń úlesin qosady senemin», - dedi M. Áshimbaev.
Senat tóraǵasy Joldaýda Salyq kodeksin jetildirýge, sybailas jemqorlyqpen kúresti kúsheitýge jáne aqparatqa qol jetkizýdi qamtamasyz etýge basa mán berilgenin eske saldy.
«Sonymen qatar, qorshaǵan ortany qorǵaýdyń zamanaýi júiesin qalyptastyratyn Ekologiialyq kodeksti qabyldaý máselesi de nazardan tys qalmady. Prezidentimiz azamattardyń, ásirese, balalardyń quqyǵyn qorǵaýǵa qatysty zańnamalyq sharalar qabylaý kerektigin aitty. Ózderińizge belgili, qazir qoǵamnyń belsendiligi aitarlyqtai artyp keledi. Azamattarymyz kópshilikti alańdatqan máseleler boiynsha pikirin ashyq bildirip, olardy sheshý joldaryn da usynyp júr», - dedi ol.
Senat Tóraǵasy bul úrdisti memleket múddesi úshin tiimdi paidalaný qajet ekenin jáne osyny eskerip, Prezident jergilikti ózin-ózi basqarýdy damytý, qoǵamdyq baqylaýdy kúsheitý, qoǵamdyq keńesterdiń rólin arttyrý baǵyttarynda quqyqtyq negiz qalyptastyrýdyń mańyzdylyǵyna toqtalǵanyn aitty.
«Aldymyzda aýqymdy jumystar tur. Sonyń bárin der kezinde jáne júieli túrde júzege asyrý úshin aianbai eńbek eteiik, árbir zań jobasyn ulttyq múdde, óńirlerdi damytý turǵysynan qarap, talqylaiyq. Bul - senatorlardyń mindeti. Zań jobalaryn qaraǵan kezde azamattyq qoǵam ókilderimen, memlekettik emes uiymdarmen, mamandarmen tyǵyz jumys isteý qajet. Qoǵamnyń suranystaryn eskerip, ózekti problemalardy talqylap, olardyń sheshilýine úlesimizdi qosý – negizgi basymdyqtarymyzdyń biri. Bizdiń osy sessiiadaǵy árbir sharamyz ashyq, ózekti, tiimdi bolyp, naqty nátijelerdi qamtamasyz etýge tiis. Aldaǵy ýaqytta senatorlar osy baǵyttarda belsendilik tanytyp, bárimiz birlesip, jumysty óte nátijeli túrde uiymdastyramyz dep senemin», - dedi Máýlen Áshimbaev.
