Senat elimizdiń barlyq óńiriniń Parlamenttegi ókildigin qamtamasyz etedi. Bul týraly QR Parlamenti Senatynyń tóraǵasy Facebook-tegi paraqshasyna jazdy, dep habarlaidy "Ult aqparat".
Máýlen Áshimbaev búgin elimizde Senat depýtattarynyń sailaýy ótip jatqanyn aityp, qoldanystaǵy zańnamaǵa sáikes ár oblystan, astanadan jáne respýblikalyq mańyzy bar qalalardan bir-birden sailanatyn 17 senatordy tańdaýshylar-máslihat depýtattary sailaitynyna nazar aýdarǵan.
«Zań shyǵarýshy bilik júiesine sáikes Senat elimizdiń barlyq óńiriniń Parlamenttegi ókildigin, Májilis quramy jańarǵan kezde zańnamalyq saiasattyń sabaqtastyǵyn jáne zań jobalarynyń sapaly qaralýyn qamtamasyz etedi. Májilis depýtattarynyń partiialyq tizimder boiynsha jáne Qazaqstan halqy Assambleiasynan sailanatynyń eskersek, Senatta óńirler múddeleriniń bildirilýi asa mańyzdy», – deidi Máýlen Áshimbaev.
Sonymen qatar Senat Tóraǵasy zań shyǵarýshy bilikti uiymdastyrýdyń qazirgi júiesi qabyldanǵan zańdardy sapaly pysyqtaýdy qamtamasyz etetinin tilge tiek etken.
«Qaralatyn másele jan-jaqty ári tereń zerttelip, zań qabyldaý jumystary kezeń-kezeńmen jáne qisyndy júrgizilýge tiis. Atalǵan jumystyń sapasy memlekettik organdardyń normalaryna, iaǵni, tutas eldiń tynys-tirshiligine yqpal etedi. Ár qabyldanǵan zańnyń ondaǵan myń otbasy men naqty adamdardyń tynys-tirshiligine tikelei áseri bar. Osy rette Parlament Palatalarynyń jumysy zań shyǵarý úderisiniń barynsha tiimdi ári teńgerimdi bolýyna múmkindik beredi jáne Zańdardy eldiń, sondai-aq, ár azamattyń múddesin eskerip qabyldaýdy qamtamasyz etedi», – Máýlen Áshimbaev.
Munan bólek ol qabyldanatyn zańdar Qazaqstan Prezidentiniń bastamalaryn zańnamalyq turǵydan qamtamasyz etýge tiis ekendigin atap ótken.
«Damýdyń jańa kezeńinde Memleket basshysy usynǵan halyqtyń turmys sapasyn arttyrýǵa jáne inkliýzivti ekonomikalyq ósýge arnalǵan jańǵyrtý baǵdaryn zańnamalyq turǵydan qamtamasyz etýdiń mańyzy zor. Bul rette depýtattardyń róli erekshe. Koronavirýs indetimen jáne onyń saldarymen kúresý úshin quqyqtyq bazany jetildirý de mańyzdy mindetterdiń biri bolyp qala beredi. Búgin sailanǵan senatorlar tiisti ókilettikterin alǵan sátten bastap atalǵan strategiialyq mindetterdi oryndaýǵa óz úlesterin qosyp, belsendi jumys isteidi dep senemin», – deidi Senat tóraǵasy.
