Parlament Senatynyń jalpy otyrysynda «Qazaqstan Respýblikasynyń keibir zańnamalyq aktilerine memlekettik basqarý deńgeileri arasynda ókilettikterdi qaita bólý máseleleri boiynsha ózgerister men tolyqtyrýlar engizý týraly» Zańy ekinshi oqylymda qaralyp, qabyldandy, dep habarlaidy QazAqparat tilshisi.
«Sizderdiń nazarlaryńyzǵa usynylyp otyrǵan zań jobasy memlekettik organdardyń derbestigi men jaýapkershiligin arttyrýǵa jáne memlekettik basqarý júiesinde sheshimder qabyldaýdyń jedeldigin qamtamasyz etýge baǵyttalǵan», - dedi senator Lázzat Rysbekova.
Memlekettik basqarý júiesin odan ári jetildirý maqsatynda QR Úkimetiniń keibir ókilettikteri ortalyq memlekettik organdarǵa beriledi.
Atap aitqanda:
- ekonomikalyq salada: strategiialyq jospardyń iske asyrylýy týraly esepti jasaý jáne usyný tártibin belgileý; aýditorlyq qyzmetti litsenziialaý kezinde qoiylatyn biliktilik talaptaryn bekitý; kásibi uiymdar men sertifikatsiialaý jónindegi uiymdar kýáliginiń nysandary men akkreditteý erejesin bekitý;
- áleýmettik salada: Semei iadrolyq poligonyndaǵy iadrolyq synaqtar saldarynan týyndaǵan iondaýshy sáýleniń áserinen bolatyn aýrýlardyń tizbesin bekitý; ekonomikalyq qyzmet túrlerin kásiptik táýekel synyptaryna jatqyzý tártibin bekitý; halyqtyń tyǵyzdyǵyna jáne eldi mekenderdiń qashyqtyǵyna qarai bilim berý uiymdary jelisiniń kepildik berilgen memlekettik normativin bekitý.
Sonymen qatar, zań jobasy aiasynda ortalyq memlekettik organdardan jergilikti atqarýshy organdarǵa keibir fýnktsiialar beriledi. Onyń ishinde:
- Bilim jáne ǵylym ministrliginen – turmystyq zorlyq-zombylyqqa ushyraǵan oqýshylar men tárbielenýshilerdiń arnaýly áleýmettik qyzmetterdi kórsetý standarttaryna sáikes arnaýly áleýmettik qyzmetterdi kórsetý qajettilikterine taldaý jasaý;
- Indýstriia jáne infraqurylymdyq damý ministrliginen - shekaralyq aimaqqa kireberisterde jol (aqparattyq) belgilerdi ornatý týraly;
- Aýyl sharýashylyǵy ministrliginen – balyq sharýashylyǵy óniminiń ónimdiligi men sapasyn arttyrýǵa, sondai-aq asyl tuqymdy balyq sharýashylyǵyn damytýǵa sýbsidiialar berý.
Sondai-aq, Ekologiia, geologiia jáne tabiǵi resýrstar, Qorǵanys, Ishki ister, Tsifrlyq damý, innovatsiialar jáne aeroǵarysh ónerkásibi ministrlikteriniń keiibir máselelerde ókilettikterin kúsheitý maqsatynda birqatar qosymsha fýntsiialar beriledi.
Óz kezeginde Senat tóraǵasy Máýlen Áshimbaev búgin qabyldanǵan zań memlekettik basqarý júiesin reformalaý aiasynda jasalyp jatqan mańyzdy qadamdardyń biri ekenin aitty.
«Zańdaǵy normalar memlekettik basqarý protsesin ary qarai jetildirýge baǵyttalǵan. Sondai-aq osy qujat memlekettik apparat qyzmetiniń tiimdiligin jáne memlekettik qyzmetterdi kórsetý sapasyn arttyrýdy kózdeidi. Bul óz kezeginde ortalyq jáne jergilikti atqarýshy organdardyń derbestigi men jaýapkershiligin kúsheitedi», - dedi Áshimbaev.
Aita keteiik, biyl qazan aiynyń sońynda Senat «Qazaqstan Respýblikasynyń keibir zańnamalyq aktilerine memlekettik basqarý deńgeileri arasynda ókilettikterdi qaita bólý máseleleri boiynsha ózgerister men tolyqtyrýlar engizý týraly» zań jobasyn birinshi oqylymda maquldaǵan edi.
