Qazaqstan Respýblikasy Parlamenti Senatynyń Tóraǵasy – Álemdik jáne dástúrli dinder liderleri sezi Hatshylyǵynyń Basshysy Máýlen Áshimbaev belgili din qairatkerlerimen kezdesti, dep habarlaidy "Ult aqparat".
Kezdesýler barysynda Senat Spikeri Qazaqstanda ultaralyq jáne konfessiiaaralyq tózimdilik, sondai-aq ózara túsinistik pen dialog elimizdegi qoǵamdyq kelisimdi saqtaýdyń asa mańyzdy sharty sanalatynyn atap ótti.
«Elimizde 18 din men konfessiiany ustanatyn 100-den astam etnikalyq top ókilderi beibit ómir súrýde. Etnosaralyq beibitshilik pen kelisim, ózge dini kózqarastarǵa degen qurmet qazaqstandyq mádeniet pen mentalitettiń ajyramas bóligine ainaldy», – dedi Máýlen Áshimbaev.
Kavkaz Musylmandary basqarmasynyń Tóraǵasy Sheih-Ýl-Islam Allashúkir Pasha-Zademen suhbat kezinde taraptar dinaralyq dialog ideialaryn jahandyq deńgeide ilgeriletýde Álemdik jáne dástúrli dinder liderleriniń sezi men Baký din liderleri forýmynyń mańyzy zor ekenin aitty. Sondai-aq olar bul eki alańnyń yntymaqtastyǵyn nyǵaitý máselelerin talqylady.
Anglikan shirkeýiniń ókili, Dorking qalasynyń episkopy Djo Beili Ýellspen kezdesý kezinde Máýlen Áshimbaev forýmnyń geografiiasy men konfessiialyq ókildigin keńeitý boiynsha atqarylyp jatqan jumystarǵa nazar aýdardy. Suhbat barysynda eki tarap Hatshylyqtyń HIH otyrysynda qabyldanatyn sheshimder Álemdik jáne dástúrli dinder liderleriniń VII sezin jańa deńgeige kóteretinine senim bildirdi.
Aita keteiik, atalǵan kezdesýler erteń Nur-Sultan qalasynda ótetin Álemdik jáne dástúrli dinder liderleri sezi Hatshylyǵynyń HIH otyrysy aiasynda uiymdastyryldy.
