Aldaǵy úshjyldyq biýdjetti Úkimet úshin úlken synaq deýge bolady. Bul týraly QR Parlamenti Senatynyń tóraǵasy Máýlen Áshimbaev aitty, dep habarlaidy QazAqparat.
«Biz Ulttyq qordan kepildendirilgen transfert týraly jáne 2022-2024 jyldarǵa arnalǵan respýblikalyq biýdjet týraly zań jobalaryn qaradyq. Buǵan deiin Senattyń turaqty komitetteri kirister men shyǵystardyń barlyq baptaryn muqiiat zerdelep, Úkimet ókilderimen birge talqylady. Búgingi otyrysta da bul máselelerdi jan- jaqty qarap, tiisti sheshimder qabyldadyq. Jalpy aldaǵy úsh jylǵa arnalǵan biýdjet elimizdiń damýyndaǵy basymdyqtardy qamtamasyz etýge baǵyttalǵan. Sońǵy jyldary Qazaqstanda pandemiia saldaryn eńserýge basymdyq berilgeni belgili», - dedi Máýlen Áshimbaev Senattyń jalpy otyrysynda.
Onyń atap ótýinshe, Memleket basshysynyń tapsyrmasymen azamattarymyz ben zardap shekken kásiporyndarǵa qoldaý kórsetýge qomaqty qarajat jumsalýda.
«Jaǵdai áli de bolsa ońai emes. Biraq, jalpy Qazaqstan pandemiia daǵdarysyn eńserip keledi dep aitýǵa bolady. Sondyqtan aldaǵy úsh jyldyń biýdjeti negizinen qaita qalypqa kelýge jáne damýǵa baǵyttalyp otyr. Biylǵy Prezidentimizdiń Joldaýynda pandemiiadan keiingi kezeńde ekonomikany qalpyna keltirýdiń naqty mindetteri belgilendi. Ónerkásiptiń tiimdiligin arttyrýǵa, óńirlerdi damytýǵa, halyqty alańdatqan ózekti áleýmettik máselelerdi sheshýge qatysty da maqsat-mindetter aiqyndaldy. Prezidentimizdiń tapsyrmasyna sáikes, jańa Memlekettik josparlaý júiesi aiasynda 10 Ulttyq joba ázirlenip, bekitildi. Olar ekonomikanyń ósýine jáne azamattarymyzdyń ómir súrý sapasyn jaqsartýǵa arnalǵan», - dedi Senat Spikeri.
Joǵary palata tóraǵasy búgin qaralǵan úsh jyldyq biýdjette sol jobalardy iske asyrý úshin tiisti qarajat bólinip otyrǵanyn atap ótti.
Sondyqtan ár teńgeni oryndy paidalanyp, memleket qarjysynyń tiimdiligin arttyrý asa mańyzdy ekendigin basa aitty.
«Jalpy, aldaǵy úshjyldyq biýdjetti Úkimet úshin úlken synaq deýge bolady. Sebebi, Úkimet ekonomikany damytý qarqynyn arttyrý jáne kóleńkeli sektordy azaitý arqyly biýdjettiń kirisin 35 paiyzǵa ósirýdi kózdep otyr. Sonymen birge biýdjet tapshylyǵyn kezeń-kezeńimen tómendetý jáne Ulttyq qordan bólinetin transfertter kólemin qysqartý josparlanǵan. Bul máseleni Senat depýtattary buǵan deiin de kótergen bolatyn. Búgin Úkimettiń osy baǵyttaǵy belsendiligin baiqap otyrmyz. Osyndai bastamalardy biz, árine, qoldaimyz. Soǵan qaramastan memlekettiń barlyq áleýmettik mindettemeleri tolyǵymen oryndala beredi», - dedi Máýlen Áshimbaev.
