QR Parlamenti Senatynyń Tóraǵasy Máýlen Áshimbaev elordadaǵy Mýzykalyq jas kórermen teatrynyń «Abai-Toǵjan» qoiylymyna joǵary baǵa berdi, dep habarlaidy "Ult aqparat".
«Byltyr elimizde Abaidyń 175 jyldyǵy keńinen atalyp ótti. Sonyń aiasynda aýqymdy jumys atqaryldy. Degenmen, uly oishyldyń ósietterin dáripteý jolynda bir jylmen shektelip qalýǵa bolmaityny túsinikti. Óitkeni bizdiń ulttyq bolmysymyz ben dúnietanymymyzdyń qalyptasýynda hakim Abaidyń róli erekshe. Biz boiymyzdy da, oiymyzdy da Abai sózderine qarap túzeimiz. Sondyqtan aqyn murasyn dáripteý, ásirese, ony óskeleń urpaqtyń sanasyna sińirý qashanda mańyzdy», - dep jazdy Senat Tóraǵasy Facebook paraqshasynda.
Osy oraida ol elordamyzdaǵy Mýzykalyq jas kórermen teatrynyń igilikti isin erekshe atap ótedi.
«Taiaýda atalǵan óner ordasynda «Abai-Toǵjan» qoiylymyn tamashalap, keremet rýhani keshtiń kýási boldym. Buǵan deiin kóbine aqynnyń ulǵaiǵan shaǵyn kórip kelsek, bul joly biz jas Abaidy kórdik. Onyń kemeńger bolyp qalyptasýynyń alǵashqy kezeńderine úńildik. Aqyn lirikasynyń bastaýyna nazar aýdardyq. Sol sebepti, atalǵan spektakldi Abaitaný ilimine tyń serpin bergen týyndy dep qabyldaimyn. Shyn máninde, oishyldyń ómir joly – kúreske toly kúrdeli jol. Ony Abai men Toǵjannyń mahabbatynan da ańǵarý qiyn emes. Sondai kezeńder aqyn filosofiiasynyń qalyptasýyna úlken áserin tigizgeni sózsiz. Qoiylymda sonyń bári erekshe tapqyrlyqpen sýrettelgen», - dedi Máýlen Áshimbaev.
Senat spikeriniń atap ótýinshe, bul teatrdyń ashylǵanyna kóp ýaqyt bola qoiǵan joq. Soǵan qaramastan Abai ómirin sahnalaý arqyly kórermenge aitary mol óner ordasy retinde tanylyp otyr. Onyń repertýarynda Muqaǵalidiń, Shámshiniń shyǵarmashylyǵyna arnalǵan qoiylymdar da bar.
«Osy rette teatrdyń akterler quramyna da toqtala ketken jón. Olardyń qatarynda Samal Esliamova, Aian Ótepbergen, Asylhan Tólepov siiaqty belgili daryn ielerimen birge jas talanttar da bar. Ónersúier qaýymǵa ǵajaiyp kóńil-kúi syilap júrgen teatr akterlerine jáne osy ujymnyń basshysy, kásibi rejisser, sheber uiymdastyrýshy Ashat Maiamerovke airyqsha alǵysymyzdy bildiremiz. Teatr – klassikalyq óner. Al, klassika qashanda biik turady. Sol sebepti, jas teatrdyń ǵumyry uzaq bolaryna senemiz jáne soǵan tilekshimiz. Alar asýlaryńyz kóp bolsyn. Indetten tezirek qutylyp, zal kórermenge lyq tolatyn kún týsyn. Qazaq óneri jasai bersin!», - dep izgi tilegin jetkizedi Senat Tóraǵasy.
