Senat tóraǵasy Máýlen Áshimbaev barsha qazaqstandyqty QR Tuńǵysh Prezidenti kúnimen quttyqtady, dep habarlaidy QazAqparat.
«Birinshi jeltoqsan – biz úshin ult bolyp uiysqan, jurt bolyp jumylǵan kún. Osydan týra 30 jyl buryn Qazaqstan halqy tarihi tańdaýyn jasap, óziniń Tuńǵysh Prezidentin sailady. El taǵdyry Elbasy Nursultan Ábishuly Nazarbaevqa senip tapsyryldy. Bul táýelsizdik jolyndaǵy asa mańyzdy qadam ekeni sózsiz. Sodan beri elimiz Táýelsiz memleket retinde tolyq qalyptasyp, saiasi, ekonomikalyq, áleýmettik jáne rýhani baǵytta tolaiym tabysqa qol jetkizdi. Shekaramyz shegendeldi, birligimiz bekemdeldi, tól qundylyqtarymyz tórge ozdy. Osy jolda kezdesken syn-qaterlerden de súrinbei óte bildik. Barlyq máselede beibitshilik pen kelisimge taban tirei otyryp, halyqaralyq abyroi-bedelge ie boldyq. Arqa tósine jańa elordamyzdy salý arqyly eldik pen egemendiktiń irgesin bekite tústik. Tutas túrki dúniesi úshin qasterli Túrkistan shaharyn qaita túletip, ulttyq biregeiligimizdi nyǵaitýdyń jańa kezeńine kóterildik», - dedi Senat spikeri.
Onyń atap ótýinshe, munyń bári Elbasymyzdyń erik-jigeri men qajyr-qairatynyń arqasynda iske asyryldy. Shyn máninde, Nursultan Ábishulynyń táýekelshildigi men tabandylyǵy, kóregendigi men parasattylyǵy qazaq halqynyń dáýirleý kezeńine jol ashty. Sonyń nátijesinde Qazaqstan órleý men órkendeýdiń ózindik úlgisin qalyptastyrdy.
«Osyndai uly jetistikterge bastaý bolǵan kúnniń jalpyulttyq merekege ainalýy zańdy qubylys. Bul – eń aldymen, Elbasymyzdyń memlekettilikti qalyptastyrý jolyndaǵy eren eńbegine kórsetilgen erekshe qurmet. Al, Elbasyna qurmet – Táýelsizdigimizge jasalǵan taǵzym.
Qazirgi býyn, ásirese, óskeleń urpaq Táýelsizdiktiń qadirin tereń sezinýi úshin búgingi merekeniń mańyzy zor. Sol sebepti, aldaǵy ýaqytta Tuńǵysh Prezident kúniniń máni arta beretini anyq.
Barshańyzdy merekemen quttyqtai otyryp, ár shańyraqqa shattyq pen qýanysh tileimin! Elimiz ben Elbasymyz aman bolsyn! Táýelsiz Qazaq Eli máńgi jasai bersin!»,- dep túiindeidi quttyqtaýyn Máýlen Áshimbaev.
