Biyl Qazaqstan ekonomikasynyń ósimi 3,1 paiyz bolatyndyǵy boljanady. Bul týraly búgin Úkimet otyrysynda 2021 jylǵa arnalǵan naqtylanǵan áleýmettik-ekonomikalyq damý boljamdy jariia etken QR Ulttyq ekonomika ministri Áset Erǵaliev aitty, dep habarlaidy QazAqparat.
«Makrokórsetkishterdiń boljamy el ekonomikasynyń ósýi boiynsha jedel derekterdi, álemdik ekonomika men naryqtaǵy oń úrdisterdi eskere otyryp, naqtylandy. Máselen, jalpy ishki ónimniń ósý qarqyny qańtar aiyndaǵy minýs 4,5 paiyzdan birinshi toqsannyń qorytyndysy boiynsha minýs 1,6 paiyzǵa deiin jaqsardy. Jyl basynan beri munaidyń ortasha baǵasy barreline 61 dollardy qurady. Bul rette munai baǵasy boiynsha Dúniejúzilik qarjy uiymynyń boljamdary 44 pen 67 dollar aralyǵynda bolyp otyr. Osyǵan bailanysty, makrokórsetkishterdi naqtylaý kezinde munaidyń ortasha jyldyq baǵasy barreline 50 dollar deńgeiinde aiqyndaldy»,- dedi ol.
Ministrdiń atap ótýinshe, Dúniejúzilik bank vaktsinalaý júrgizýdiń tiimdiligine bailanysty álemdik ekonomikanyń ósýin 1,6-dan 5 paiyzǵa deiin boljap otyr.
«Joǵaryda aitylǵandardy eskere otyryp, el ekonomikasynyń ósý boljamy 2,8-den 3,1 paiyzǵa deiin jaqsardy. Bul rette nominaldy jalpy ishki ónim 77,8 trln teńge kóleminde baǵalanýda. Syrtqy suranysty qalpyna keltirý aiasynda metallýrgiiadaǵy óndiristiń neǵurlym belsendi ósýi esebinen óńdeýshi ónerkásiptegi boljamdy kórsetkishter 4,1-den 5,2 paiyzǵa deiin jaqsardy. Qurylysta josparlanǵan 17 mln sharshy metr turǵyn úidiń paidalanýǵa berýine bailanysty boljam 2,5-ten 5 paiyzǵa deiin jaqsardy», - dedi ministr.
Onyń atap ótýinshe, aqparat pen bailanysta IT qyzmetterge suranystyń ósýi nátijesinde boljam 3,8-den 6,5 paiyzǵa deiin ulǵaidy.
«Ulttyq banktiń boljamy boiynsha eksport 10,8 mlrd dollarǵa iaǵni 52,2 mlrd dollarǵa deiin ulǵaiady. Import 37,1 mlrd dollardy quraidy. Infliatsiia buryn bekitilgen 4,0-6,0 paiyz dálizde saqtaldy», - dedi Áset Erǵaliev.
