Jeli qoldanýshylary bul videoǵa 5 myńnan astam pikir qaldyrǵan.
"Asanáli aǵamyzǵa bári jarasady", "Ańyz adamnyń kóligi", "Zań barlyǵyna ortaq", "Shyndyqqa janaspaidy", - deidi olar.
Al "Million" komandasynyń múshesi Mansar Orynhan Asanáli Áshimovtiń memlekettik nómir ornyna initsial qoldanýǵa ruqsat alǵan jalǵyz qazaqstandyq ekenin jetkizgen.
"Mine, mynaý Asanáli Áshimov aǵamyzdyń kóligi eken. Sol kisige ǵana osylai júrýge ruqsat berilgen", - dedi ol TikTok-ta taralǵan videolardyń birinde.
Biz KSRO Halyq ártisi, Qazaqstannyń Eńbek Eri Asanáli Áshimovtiń áieli Baǵdat Áshimovamen bailanysyp, máseleniń mán-jaiyn suradyq.
"Bul jalǵan aqparat ekenin bildirgim keledi. Qazir Jelide kóptegen aqparat tarap jatyr, onyń barlyǵy da qoldanýshylardyń qiialynan týdy. Asanáli Áshimovke Qazaqstanda mundai erekshe nómirmen júrýge ruqsat joq", - deidi ol.
Sonymen qatar, Áshimova ASANALI nómiriniń qaidan paida bolǵanyn túsindirip berdi.
"Asanáli Áshimovtiń 85 jas mereitoiynda osy nómirdi ýaqytsha taqqan edi. Onyń ózinde syrtqa shyqqan joq. Al qala ishinde videoǵa túsip qalǵan sátke toqtalsaq, bul jańadan túsirilip jatqan filmniń kadrlary ekenin bilip júrińizder. Qazir Asanáli Áshimov týraly film túsirilip jatyr, ol úshin Qazaqstannyń barlyq oblysyn aralap shyqqan edi", - dedi akterdiń jubaiy.
Bul jaǵdai týraly Qyzylorda oblysynyń politsiia qyzmetkerleri de jaýap berdi.
"Oblystyń politsiia qyzmetkerleri memlekettik nómir belgisiniń standartqa sáikes kelmegeni úshin "Cadillac" avtokóligin toqtatty. Avtokólik akter, rejisser, KSRO Halyq ártisi, Qazaqstannyń Eńbek Eri Asanáli Áshimov, Qazaqstan teatrlary qaýymdastyǵynyń prezidenti Asanáli Áshimovke tiesili bolyp shyqty. Ýaqytsha nómir akterdiń 85 jyl mereitoiyna arnalǵan derekti film túsirýge paidalanyldy. Politsiia qyzmetkerleriniń eskertýinen keiin avtokólikke tiisti memlekettik belgi bekitildi", - delingen vedomstvo habarlamasynda.
