QR eńbek sińirgen qairatkeri, akter, M. Áýezov atyndaǵy Qazaq memlekettik akademiialyq drama teatry basshysy Erlan Biláldiń otbasy akterdiń para alyp jatqan jerinde túsirilgen sýreti dep taratqandardy izdestirip jatyr, - dep habarlaidy "Ult aqparat" Tengrinews.kz agenttigine silteme jasap.
"Qazir munymen advokat ainalysyp jatyr. Jemqorlyqqa qarsy qyzmettiń ókilderi resmi túrde sýretti eshkimge bermegenin jariialady. Kez kelgen zańǵa baǵynǵan azamat mundai sýretterdi taratpaýy tiis. Sebebi tergeý qupiiasy degen bar. Taratýshylardy taýyp, jazalaý kerek. Buǵan, árine, ýaqyt kerek", - dedi Almatyda ótken baspasóz konferentsiiasynda ártistiń januiasyna dos bolyp keletin belgili rejisser Ashat Maemirov.
Baspasóz konferentsiiasynda óner salasyndaǵy ziialylar qatysty. Olar Erlan Biláldiń tabysy jaily jáne teatr direktory qyzmetinde qandai bolǵany jaily aitty.
"Búgin óner salasyndaǵy ziialylar, jazýshylar, dramatýrgtar, rejisserlar men teatr qyzmetkerleri jinaldy. Bizdiń teatrymyzda bolǵan oqiǵa - súreńsiz jaǵdai, bul barlyǵymyzdy alańdatady. Sebebi munda istegen jas direktor, eki jarym jyl osy qyzmette boldy jáne osy ýaqyt ishinde bizdiń damýymyz, gastroldik saparlarǵa shyǵýymyz - ol barlyǵyn da óziniń taza eńbegimen tapty. Mundai jaǵdai oryn alǵanyna jabyrqaýlymyz. Meniń aitpaǵym, bul iste ony ǵana emes osyny uiymdastyrǵandardy jazalaý kerek. Onyń osynsha qarajatty alǵany - durys emes, ol jazasyn alady. Biz qazir onyń kim ekenin, qandai adam ekenin aitqymyz keledi, biz aitpasaq kim aitady? Kez kelgen adammen osyndai jaǵdai bolýy múmkin, menińshe, bul - kezdeisoqtyq. Osylai boldy, adamnyń da súrinetin kezi bolady. Bir rettik jaǵdai - onyń búkil ǵumyryna sabaq bolady. Keleside ol obrazdardy shyǵarý kezinde oǵan osy kómektesedi", - dedi Qazaqstan teatrlar assotsiatsiiasynyń prezidenti, Qazaqstan eńbek eri, QR jáne KSRO halyq ártisi Asanáli Áshimov.
Shyǵarmashylyq intelegentsiia ókilderi sot úkimi shyqqanǵa deiin asyǵys sheshim shyǵarmaýǵa jáne kinásizdik prezýmptsiiasyn saqtaýǵa shaqyrdy.
"Qazaqstan mádenietinde Erlan Bilálǵa yńǵaisyz jaǵdai boldy. Men uzaq ýaqyt shyǵarmashylyq adamdarymen aralasyp kelemin, 2017 jyl "Rýhani jańǵyrý" baǵdarlamasyn iske asyrý jyly boldy. Londonda boldyq, Japoniiaǵa gastroldik saparlar boldy. Qazaqstanda talantty akterler men teatr baryn tanydy. (...) Bul Erlannyń ǵana emes, bárimizdiń qaiǵymyz. (...) Bári obektiv bolǵanyn qalaimyn. Qazynalyq organdar ainalyssyn, ony joǵaltqymyz kelmeidi", - deidi Memlekettik respýblikalyq korei mýzykalyq komediia teatrynyń jetekshisi Liýbov Li.
"Menińshe, talantty adam ańǵal ári qorǵansyz. Erlan dál sondai. (...) Asanáli Áshimov, Esmuhan Obaev, barlyq akter, aqyndar men jazýshylar bul jerge beker jinalmady. Olar ónerdegi joldastaryn qorǵaýǵa júrek qalaýymen keldi. Bul óte unamsyz jaǵdaida barynsha obektivti bolýǵa shaqyramyn", - deidi Qazaqstannyń jazýshylar odaǵynyń tóraǵasy Nurlan Orazalin.
Óz kezeginde, elimizge belgili aktrisa Kúnsulý Shaiahmetova bul jaǵdaidy ónerge jasalǵan qiianat dep atady.
«Janym aýyryp, býynsyz jerge pyshaq urǵan sátte elim deitin erdiń arqasyna tigen qamshysyna arqasyn tóseitin qandastarynyń joqtyǵy meniń janyma batty. Men eki teatrdan da qýylǵan balanyń birimin, jese taiaqty jegen balanyń birimin. Ónerge qiianat jasalyp jatyr, aǵaiyn, biraq, eshkimdi de tabalamaimyn. Osy jaǵdaidy estigen kezimde, eki týyp, bir qalǵanym emes, teatrda da keremet jaǵdaiymdy jasady dep aita almaimyn, biraq men munda shyndyq izdep kelip otyrmyn. Bul – qasaqana ónerge jasalǵan qiianat dep bilemin», - deidi aktrisa.
5 qańtarda jemqorlyqqa qarsy qyzmettegiler M. Áýezov atyndaǵy Qazaq memlekettik akademiialyq drama teatry direktory Erlan Biláldiń Jańa jyl kezinde balalarǵa qoiylym qoiý maqsatynda teatrdan oryn berý úshin zańdy tulǵadan 1,5 million teńge para aldy degen kúdikke ilingenin habarlady.
Sol kezde QR Memlekettik qyzmet isteri jáne sybailas jemqorlyqqa qarsy is-qimyl agenttiginiń resmi ókili Nurlan Jahin: "Kinásin tolyq moiyndaýyna bailanysty ol qamaýǵa alynǵan joq. Sotqa deiingi tergeý sharalary júrip jatyr", - dep málimdegen edi.
Erlan Bilál 2015 jyldyń 27 sáýirinen bastap M. Áýezov atyndaǵy Qazaq memlekettik akademiialyq drama teatry direktory qyzmetinde bolǵan edi. Direktor bolǵan kezde ol Qazaq handyǵynyń 550-jyldyǵyna, Táýelsizdiktiń 25 jyldyǵyna orai birneshe is-shara ótkizip, sondai-aq, Astanadǵy EXPO 2017 kórmesi kezinde gastrolder uiymdastyrǵan. Onymen qosa, Erlan Bilál teatrdyń 90-jyldyǵyn joǵarǵy deńgeide atap ótken-tin.
2017 jyldyń jeltoqsan aiynyń sońynda Áýezov teatry Erlan Biláldiń bastamasymen QR Prezidentiniń "Rýhani jańǵyrý" baǵdarlamasynyń aiasynda Tokioǵa attandy. Japoniiada kórsetilgen "Aqtastaǵy Ahiko" spektali myńdaǵan adamdy jinady, sondai-aq, Japoniianyń jergilikti teatr synshylary da bul qoiylymdy joǵary baǵalaǵan edi.
QR eńbek sińirgen qairatkeri, Qazaqstan Jastar odaǵy syilyǵy laýreaty Bilál Erlan Ábdildauly 1971 jyly Almaty oblysy, Raiymbek aýdany, Tekes aýylynda dúniege kelgen.
1993 jyly Qazaq Memlekettik T. Júrgenov atyndaǵy Teatr-Kino institýtyn (qazirgi Óner akademiiasy) teatr-kino akteri mamandyǵy boiynsha bitirgen. Osy jyly M.Áýezov teatrynyń akterlik tobyna qabyldandy.
2011 jyly 12 qyrkúieginen bastap M. Áýezov teatry direktorynyń orynbasary qyzmetine taǵaiyndaldy. 2014 jyly Ǵ. Músirepov atyndaǵy Qazaq Memlekettik akademiialyq balalar men jasóspirimder teatrynyń kórkemdik jetekshisi qyzmetterin atqarǵan. 2015 jyly 27 sáýirinen bastap M. Áýezov atyndaǵy Qazaq memlekettik akademiialyq drama teatrynyń direktory.
QR Jastar odaǵy syilyǵynyń laýreaty (2002 jyly), QR eńbek sińirgen qairatkeri (2007 jyly), Qazaq Ulttyq T.Júrgenov atyndaǵy Óner Akademiiasynyń aǵa oqytýshysy (2008 jyly).
