QR Jumyrtqa óndirýshiler qaýymdastyǵynyń prezidenti Maksim Bojko qus eti men qus ónimderin tańdaý boiynsha birqatar keńes berdi, dep habarlaidy QazAqparat tilshisi.
Onyń aitýynsha, Qazaqstanda óndiriletin qus ónimderi sapaly jáne 100% qaýipsiz.
«Keibir tutynýshylar otandyq ónimderden sál arzan bolǵany úshin kórshiles elderdiń ónimderin satyp alady. Máselen, EAEO boiynsha seriktesterimizdiń taýyq etteri Qazaqstanǵa arzanyraq baǵamen keledi. Al onyń jalpy salmaǵynyń 15-30 protsentin sýmen toltyryp, muzǵa qatyryp ákeledi. Tutynýshy aldanbaýy úshin jáne sýǵa artyq qarajat shyǵyndamaýy úshin Qazaqstannyń qatyrylmaǵan taýyq etterin alýǵa keńes beremiz, - dedi Maksim Bojko Ortalyq kommýnikatsiialar qyzmetinde ótken baspasóz máslihatynda.
Sonymen birge, qaýymdastyq basshysy otandyq ónimderdiń artyqshylyqtaryn atap ótti.
«Birinshiden, QR AShM Veterinarlyq qyzmeti men QR DSM Qoǵamdyq densaýlyq saqtaý komiteti otandyq ónimderge únemi tekserý júrgizip otyrady. Sondyqtan olar sapaly jáne 100% qaýipsiz. Al Qazaqstanǵa keletin importtyq ónimder sol eldiń veterinarlyq sertifikatymen keledi de, olarǵa Qazaqstan tarapynan qosymsha tekserý júrgizilmeidi», - dedi ol.
Ekinshiden, otandyq ónimdi tańdaý arqyly qazaqstandyqtar soiylǵanyna kóp ýaqyt óte qoimaǵan dámdi taýyq etin ala alady. Qazaqstannyń barlyq óńirinde derlik jumyrtqa jáne taýyq eti fabrikalary bar jáne muzǵa qatpaǵan, jai ǵana sýytylǵan taýyq etin alýǵa bolady.
«Qatyrylmaǵan taýyq eti 5 kúnge ǵana jaramdy boldy jáne ony shetelden tasymaldaý múmkin emes. Úshinshiden, bizdiń qustar óz jerimizde ósken dándi daqyldarmen, ekologiialyq taza jem-shóppen qorektenedi. Sondyqtan, otandyq taýardy tańdaǵan áldeqaida tiimdi», - dep óz sózin túiindedi Maksim Bojko.
Aita keteiik, 2018 jyldyń maýsym aiynda QR AShM qus tumaýy tirkelgen Reseidiń 36 qus fabrikasynyń ónimin ákelýge tyiym salǵan edi. Qazan aiynda bul tyiym taǵy uzartyldy.
Maksim Bojkonyń aitýynsha, Qazaqstannyń qus fabrikalarynda qus tumaýy tirkelgen joq.
