Aptanyń ár dúisenbisinde Densaýlyq saqtaý ministrliginiń resmi ókili Baǵdat Qojahmetov koronavirýs infektsiiasyna qatysty jaǵdaidy baiandaityn bolady. Bul týraly Ortalyq kommýnikatsiialar qyzmetindegi baspasóz máslihatynda aityldy, dep habarlaidy "Ult aqparat".
«QR Densaýlyq saqtaý ministrliginiń resmi ókili retinde apta saiyn elimizdegi epidemiologiialyq ahýal jóninde jáne halyqqa kórsetilip jatqan meditsinalyq járdem týraly aqparat berip turatyn bolamyz. Sonymen qatar, indetke qarsy kúrestiń nátijeleleri jaiynda baiandaimyn», - dedi Baǵdat Qojahmetov.
Osy oraida ol Densaýlyq saqtaý ministrliginiń ózindik media ortalyǵy iske qosylǵanyn eske saldy. Onyń negizgi mindeti – qoǵamdyq ortamen, aqparat quraldarymen jáne memlekettik organdarmen aradaǵy bailanysty nyǵaitý.
«Ministrliktiń atyna kelip túsetin aryz-shaǵymdarǵa jedel jaýap berýge ázirmiz. Baspasóz májilisinde qoiylatyn suraqtardan bólek, meniń jeke paraqshama jiberilgen suraqtardy, áleýmettik jelide aitylatyn saýaldardyń barlyǵyn qamtýǵa tyrysamyz», - dedi resmi ókil.
