QR Bilim jáne ǵylym ministri Ashat Aimaǵambetov Arystaǵy jańa oqý jylyna daiyndyq týraly aityp berdi, dep habarlaidy QazAqparat tilshisi.
«Biz Arysqa birneshe ret bardyq. Qazirgi ýaqytta onda Bilim jáne ǵylym ministrliginiń ókili júr. Ol mektepterdegi jóndeý jumystaryn qadaǵalaidy. Jańa oqý jylyna qala men ondaǵy bilim berý mekemeleri tolyq daiyn bolady dep aita alamyz», - dedi Ashat Aimaǵambetov elordada «Burabay Forum» ashylýynda tilshilerge bergen suhbatynda.
Sonymen birge, ministr mektepterdiń jai-kúii týraly aityp berdi.
«Terezesine ǵana zaqym kelgen mektepter bar. Tek ishinara jóndeý jumystary qajet mekemeler boldy. Biraq, is júzinde shamamen barlyq mektepke kúrdeli jóndeý júrgizildi. Máselen, jarylystan zardap shekpegen sporttyq zaldardyń da edenderi aýystyryldy. Apta saiyn Arysqa baramyz jáne úlken ózgeristerdiń kýási bolyp jatyrmyz. Barlyq mektep oqý jylyna ázir bolady, oǵan alańdaýdyń qajeti joq», - dedi ol.
Buǵan deiin Arys qalasynda 6 704 úidiń jóndeý jumystary aiaqtalǵany habarlanǵan edi. Qalany qalpyna keltirý jumystaryna 184 kompaniia, 7 382 qurylysshy jáne 298 arnaiy tehnika qatysýda.
