Arystaǵy jarylystar kezinde adasyp qalǵan kishkentai qyzdyń ata-anasy tabyldy, dep habarlaidy "Ult aqparat" Túrkistan oblysy ákiminiń keńesshisi Sáken Qalqamanovqa silteme jasap.
«Adasqan qyzymyz tabyldy. Ol - Aiala Orazhan. Sheshesi evakýatsiialanǵan jerinen - Saryaǵashtan jetti. Taǵy bir otbasy túgel boldy. Bizdiń shtab kúni boiy oǵan quddy polktiń qyzyndai qamqorlyq jasady», - dep jazdy S.Qalqamanov Facebook-te.
Buǵan deiin QR Ishki ister ministriniń orynbasary Iýrii Ilin Arystaǵy jarylys kezinde birshama bala ata-anasynan adasyp qalǵanyn habarlaǵan bolatyn. Onyń aitýynsha, Túrkistan oblysynyń ákimdigi árbir balany sýretke túsirip, ákimdiktiń saityna shyǵarý týraly sheshim qabyldaǵan.
Keshe tún ortasyna qarai Arystaǵy jarylystar kezinde adasqan 177 bala ata-anasymen qaýyshqany habarlandy.
Artynsha QR Bilim jáne ǵylym ministrligi 945 balanyń týys-týǵandaryna tapsyrylǵanyn resmi málim etti.
QR Ishki ister ministrliginiń 26 maýsym kúngi deregine sáikes, barlyq sábi ata-anasynyń qolyna jetti.
QR BǴM aqparatynsha, tótenshe jaǵdai boiynsha oblystyq shtab qurylyp, turǵyndardy basqa jerlerge ornalastyratyn 48 ortalyq ashyldy. Jalpy, Arys qalasy men aýyldarda 40 mektep (18399 bala), 50 mektepke deiingi uiymdar jumys atqarady (5071 bala). Qaýipti aimaqta 13 mektep (11377 bala), 6 memlekettik, 23 jekemenshik balabaqsha (3278 bala) ornalasqan. Olardaǵy balalardyń barlyǵy qaýipsiz jerlerge kóshirildi», - delingen ministrlik aqparatynda.
