Túrkistan oblysyndaǵy shtab músheleri Arys qalasynyń mańynda brifing ótkizip, qaladaǵy qazirgi jaǵdai turaqtalyp, qalany tazartý jumystary júrgizilip jatqanyn aitty, – dep habarlaidy Ult aqparat.
Brifinge Túrkistan oblysy ákiminiń orynbasary Joldymurat Amanbaev pen oblys ákiminiń keńesshisi Ulasbek Sádibekov, Shymkent qalasynyń ákiminiń orynbasary Qairat Nurtai qatysyp, barlyq jaǵdaidy baiandady.
Túrkistan oblysy ákiminiń orynbasary Joldymurat Amanbaev kúni keshe Túrkistan oblysynda «Túrkistan» korporativtik áleýmettik damý qorynda arnaiy esep-shot ashylǵanyn habarlap: «Úsh kúnnen beri atalǵan qorǵa respýblikamyzdyń túkpir-túkpirinen qazaqstandyqtar qarjylaryn aýdaryp jatyr. 26 maýsymdaǵy málimet boiynsha qorǵa túsken qarjy kólemi 225 mln teńgege jetti» dedi.
Shtab músheleriniń sózine qaraǵanda, Arys qalasynda bolǵan tótenshe jaǵdaiǵa bailanysty zardap shekken azamattarmen tolyqqandy jumys júrgizilýde. Evakýatsiialyq pýnktterde 24 myńnan astam adam tirkelgen bolsa, olardyń 20 myńǵa jýyǵy Shymkent qalasyna ornalastyrylǵan. 4 myńnan astam adam Túrkistan oblysynyń aýdandarynda tiisti kómek alýda. Budan bólek, Arys qalasyndaǵy tótenshe jaǵdaiǵa bailanysty Túrkistan oblysy men Shymkent qalasynda 70-ke jýyq qonystaný ortalyqtary jumys isteýde. Halyq ornalasqan orta mektep, kolledj, balabaqsha, mektep-internattarda evakýatsiialanǵan azamattarǵa barlyq qajetti jaǵdailar jasalǵan.
