Aimaq basshysy Danial Ahmetovtiń bastamasymen qolǵa alynǵan Arys qalasynyń turǵyndaryna kómek kórsetý sharalaryna alǵashqylardyń biri bolyp óńirimizdegi iri kásiporyndar atsalysa bastady, dep habarlaidy altaynews.kz.
Búginde «Kaztsink», «ÚMZ», «TMK» men Baqyrshyq taý-ken óndirý kásiporyny arnaiy qurylǵan qaiyrymdylyq qoryna 107 million teńgeden astam qarajat aýdarǵan. Saýapty isten oblystaǵy etnomádeni birlestikteri de qalyspaýda. Sońǵy aqparat boiynsha atalmysh birlestikter Arys qalasynyń turǵyndaryna 738 myń teńge aýdarypty. Bul jóninde óziniń Feisbýk paraqshasynda oblys ákiminiń orynbasary Ásem Núsipova jazady.
Osydan buryn habarlaǵanymyzdai, «Shyǵys Aqparat» mediholdinginiń ujymy da jalpyhalyqtyq isten shet qalmai, Arys qalasyndaǵy zardap shekkenderge qarjylai kómek kórsetti. Mediaholdingtiń 200-den astam qyzmetkeri azamattyq tanytyp, apatqa ushyrap jatqan Arys turǵyndaryna bir kúndik eńbekaqylaryn bir kisidei aýdarady.
– Túrkistan oblysyndaǵy qaiǵyly oqiǵaǵa bailanysty Arys qalasynan bir myń adamdy qabyldaýǵa daiynbyz. Osy maqsatta aldaǵy ýaqytta oblystyq ákimdik mamandary Arys qalasyna baryp, jergilikti halyqqa arnalǵan bos oryndar jármeńkelerin ótkizip, maman keńesterin bermek. Arys turǵyndaryna 1 528 bos jumys ornyn usynamyz. Qajet bolsa, biz Eńbek jáne áleýmettik qorǵaý ministrligine kvota jáne qarjylandyrý kólemin arttyrý jónindegi usynyspen shyǵýǵa daiynbyz, – dep jazady oblys ákiminiń orynbasary.
