QR Qorǵanys ministrligi Arysta bolǵan tótenshe jaǵdai týraly rolik túsirdi.
Filmniń siýjeti Arys qalasyndaǵy áskeri qoimalarda bolǵan jarylystyń saldarynan halyqtyń bastan keshirgen qiyn sátterin beineleidi. Beine-materialda ata qonystarynan ketýge májbúr bolǵan qala turǵyndary óz qaiǵylarymen bólisken. Al áskeri órt sóndirýshiler apat ornynda órtti qalai aýyzdyqtaǵanyn, týǵan-týystaryn izdep janushyrǵanyn aitady.
Arys qalasyndaǵy tótenshe jaǵdaidyń saldaryn joiý úshin QR qarýly kúshteriniń ártúrli bólimderinen 2500-den asa adam qatysqan. Jarylystan 1 qala turǵyny jáne órt sóndirý kezinde eki áskeri qyzmetshi qaza tapty.
Arystaǵy apat dúiim jurtty biriktirip, el birliginiń bekem ekenin ańǵartty.
Eske salsaq, 24 maýsym kúni tańǵy saǵat 9.30 shamasynda Arys qalasyndaǵy áskeri qoimada órt bolyp, joiqyn jarylys bolǵan edi. Túrkistan oblysynyń ákimi Ómirzaq Shókeev qala halqyn dereý qaýipsiz jerge kóshirýge buiryq berip, Arysta tótenshe jaǵdai jariialanǵan edi. Qazir qaladaǵy qiraǵan úilderdi qalpyna keltirip, jóndeý jumystary áli de jalǵasyp jatyr.
