Arys qalasyndaǵy vagon jóndeý deposy filialynyń bazasynda vagon dońǵalaqtaryn kúrdeli jóndeýden ótkizetin sheberhana ashyldy. Sala mamandarynyń aitýynsha, bul respýblika boiysha 13-shi, al ońtústik óńirde iske qosylǵan alǵashqy jóndeý sheberhanasy.
Saltanatty jiynǵa qala ákiminiń orynbasary Erǵali Qýandyq pen «QTJ-Júk tasymaly» JShS-niń «Shymkent júk tasymaly bólimshesi» filialynyń direktory Amankeldi Arysbaev, «Qaztemirtrans» AQ bas injeneri Nurlan Júsipov pen ózge de seriktes kásiporyn basshylary jáne temirjol salasynyń maitalmandary men vagon deposynyń qyzmetkerleri qatysty.
Qala ákiminiń orynbasary Qazaqstandaǵy temirjol salasynda Arys qalasynyń alar orny erekshe ári mańyzy joǵary ekendigin atap ótti. Búginde 270 adamdy jumyspen qamtyp otyrǵan bul kásiporynda jańa óndiristik tsehtyń ashylýy nátijesinde, taǵy 25 adam turaqty jumysqa ornalasady dep josparlanǵan.
Jalpy, bul sheberhana qyzmeti oblys aýmaǵyndaǵy temirjol salasynda ǵana emes, respýblika boiynsha suranysqa ie. «Astana Railways Services» JShS-niń bas direktory Baýyrjan Musaǵitovtyń pikirinshe, mundai kásiporynnyń Arys qalasynda iske qosylýy quptarlyq jait. Óitkeni, qazirgi kezde Almaty men Qyzylorda oblysynyń aralyǵyn qamtityn temirjol sharýashylyǵynda mundai deńgeide qyzmet kórsetetin kásiporyn joq.
Al «Astana Railways Services» JShS Arys vagon jóndeý deposy» filialynyń direktory Ádilhan Ibragimov bolsa, sheberhana dońǵalaq juptaryn kúrdeli jóndeýge arnalǵan óndiristik strategiialyq nysan ekenin tilge tiek etti.
Onyń sózinshe, bul jerde dońǵalaq juptary aǵymdaǵy, ortasha jáne kúrdeli jóndeýden ótkiziledi. Demek, endigi jerde vagon parki ieleri dońǵalaq juptary men vagondardy jóndeý úshin ýaqyt joǵaltpai ári qosymsha shyǵyndalmai «bir tereze» qaǵidasymen qyzmetti tiimdi paidalana alady.
Saltanatty shara aiasynda kásiporyn lentasy qiylǵan soń, qonaqtar nazaryna sheberhananyń jumys isteý protsesi kórsetilip, vagon jóndeý deposynyń tynys-tirshiligi kópshilikke tanystyryldy.
Aita keteiik, 600 sharshy metr aýmaqta ornalasqan sheberhanada úlkendi-kishili 7 stanok jumys isteidi. Óndiristik-tehnikalyq bólimniń bastyǵy Jandos Jumabaevtyń aitýynsha, vagon jóndeý deposynda qazirgi kezde 270 adam eńbek etedi.
