Túrkistan oblysynyń Arys qalasynda bolǵan jol-kólik oqiǵasy saldarynan úsh adam kóz jumyp, taǵy eki adam jaraqat aldy. Atalǵan derek boiynsha qylmystyq is qozǵaldy, dep habarlaidy ult.kz.
Aldyn ala málimet boiynsha, JAC markaly avtokólikti basqarǵan áiel mas kúide birneshe adamdy qaǵyp ketken. Oqiǵadan keiin júrgizýshi oqiǵa ornynan ketip qalǵan.
Politsiia qyzmetkerleri jedel izdestirý sharalaryn júrgizip, kúdiktini anyqtap, ustady. Qazirgi ýaqytta ol ýaqytsha ustaý izoliatoryna qamalǵan.
– Oqiǵa saldarynan úsh adam, onyń ishinde eki kámeletke tolmaǵan jasóspirim qaza tapty. Sondai-aq eki zardap shegýshi meditsinalyq mekemege jetkizilip, qajetti kómek kórsetildi, – dep habarlady Túrkistan oblystyq politsiia departamenti.
Qazir tergeýshiler oqiǵanyń barlyq mán-jaiyn anyqtaý jumystaryn júrgizip jatyr. Tergeý nátijesi boiynsha zańǵa sáikes protsessýaldyq sheshim qabyldanady.
Politsiia turǵyndardy jalǵan aqparat taratpaýǵa jáne tek resmi aqparat kózderine senýge shaqyrdy.
