Túrkistan oblysynyń ákimi Ómirzaq Shókeev aptalyq apparattyq májilisti Arys qalasynda ótkizdi, dep habarlady ákimdiktiń baspasóz qyzmeti.
Jiynda Arys qalasyn qalpyna keltirý máselesi talqylanyp, jumystar pysyqtaldy. Óńir basshysy qysqa merzimde Arys qalasyn qalpyna keltirý, turǵyndarǵa jaǵdai jasaý baǵytyndaǵy barlyq máseleni talqylap, osy jaýapty mindetti otanshyldyqpen, janashyrlyqpen atqarý kerektigin aitty.
«Men osynda 1 ai bolyp qurylysty kúnde basynda turyp qadaǵalaimyn. Eger qai aýdan uiymdastyra almasa, jaýaptysyn jumystan bosatamyn. Al jaýapty oblystar men qalalar salǵyrttyq tanytsa, Úkimet basshysyna málimdeimin. Halyqtyń muqtajyn jedel sheshýimiz kerek», – degen ákim 17 sektordyń jumysyn jandandyrý jóninde tapsyrma berdi.
Árbir sektordyń jumysyn óńir ákimderiniń jáne aýdan, qala ákimderiniń orynbasarlary jáne Arys qalasynan bir jaýapty ókil, jalpy sany 51 adam úilestiredi. Jeke-jeke shtab quryp, úilerdiń qurylysy, gýmanitarlyq kómek taratý, qaýipsizdikti saqtaý, qalany tazartý, turǵyndardy aqparattandyrý jáne ózge de máseleler boiynsha kún saiyn málimet berip otyrady.
Apparat májilisinde Atyraý, Qaraǵandy, Jambyl, Mańǵystaý, ShQO oblystary jáne Nur-Sultan qalasy ákiminiń orynbasarlary men jaýapty ókilderiniń málimetteri tyńdaldy. «Samuryq-Qazyna» ál-aýqat qory men QR «Atameken» ulttyq kásipkerler palatasynyń jaýapty ókilderi de ózderine tapsyrylǵan jumystardyń barysy týraly baiandady. Aýdan ákiminiń orynbasarlary da ózderine júktelgen aýmaq boiynsha esep berdi.
Búginde Arys qalasyndaǵy úilerdi tekserý, qurylys nysandarynyń jobalyq-smetalyq qunyn esepteý jumystary júrgizilip jatyr. Keibir úilerdiń terezeleri aýystyryla bastaǵan. Barlyq sektor boiynsha úilerdi tekserý, akt toltyrý jumystary aiaqtalýǵa jaqyn. Merdigerler anyqtalyp, qurylys brigadalary jasaqtalǵan.
Oblys ákimi Ómirzaq Shókeev qaladaǵy kópqabatty úilerdiń shatyrlary, syrtqy kórinisi jinaqy ári birkelki bolý kerektigin eskertti. Azyq-túlik úlestirý jáne ózge de jumystardy úilestirýge jergilikti belsendi turǵyndardy tartýdy tapsyrdy. Sonymen birge jiynda qalany aýyz sýmen, elektr qýatymen úzdiksiz qamtý, balalardy demalys oryndaryna jiberý, órt qaýipsizdigin saqtaý, ataýly áleýmettik kómekterdi ýaqtyly aýdarý máseleleri de talqylanyp, naqty josparlar jasaldy.
