Túrkistan oblysynyń politseileri dári-dármekti joǵary baǵamen satýdyń kezekti faktilerin anyqtady, dep habarlaidy "Ult aqparat".
Túrkistan oblysynyń politseileri karantin kezinde suranysqa ie dári-dármek satý faktilerin anyqtaý úshin kezekti reidke shyqty. Kún saiyn politseiler, densaýlyq saqtaý jáne jergilikti organ ókilderinen turatyn mobildi top reid júrgizedi.
Budan bólek, mobildi toptar karantin kezinde maska rejimin jáne basqa da sanitarlyq qaýipsizdik normalaryn saqtaý úshin profilaktikalyq jáne túsindirý jumystaryn júrgizedi.
Mysaly, Arys aýdanynda mobildi top dárihanalardyń birin tekserý kezinde birqatar zańbuzýshylyqtardy anyqtady. Bul dárihana sanitarlyq normalardy saqtamaǵan, talapqa sai kelmeidi, azyq-túlik dúkenimen bir ǵimarattyń ishinde ornalasqan.
Dárihana qyzmetkeri dári-dármekti tiisti litsenziiasyz satqan. Tekserý barysynda mobildi top satýshydan 400-ge jýyq oramnan 140 túrli dári-dármek tárkiledi.
Sol kúni Arys aýdandyq politsiia bólimine jergilikti dárihanalardyń birinde dári-dármekterdi joǵary baǵamen satatyny týraly habarlama kelip tústi. Tekserý barysynda dárihananyń satýshysy «Novigan Neo» jáne «Nimesýlid» dárilerin joǵary baǵamen satqany anyqtaldy.
Barlyq material tiisti sheshim qabyldaý úshin taýarlar men qyzmetterdiń sapasy men qaýipsizdigin baqylaý komitetine jiberiledi.
Saryaǵash aýdanynyń politsiia bólimine Saryaǵash qalasynda belgisiz tulǵalar dári-dármekterdi joǵary baǵamen satatyny týraly habarlama túsken. Jedel-izdestirý is-sharalaryn júrgizý barysynda, jergilikti turǵynnyń «Meropenem» 50 qaptamasyn tiisti qujatsyz 590 myń teńgege satyp jatqan jerinen ustady.
Tártip saqshylary aiǵaqty tárkilep alyp, jas jigitti politsiia bólimine jetkizdi. Atalǵan jait Saryaǵash aýdandyq politsiia bólimine tirkelip, tekserý júrgizilýde.
Tártip saqshylary Maqtaaral aýdanynda taǵy bir dári-dármekterdi joǵary baǵamen satý oqiǵasyn anyqtady. Politsiiaǵa jergilikti turǵyn Atakent kentindegi dárihanada dári-dármekterdi belgilengen baǵadan qymbat satyp jatqany týraly aryzdanǵan. Politsiia qyzmetkerleri dárihana qyzmetkeri «askorbin qyshqylynyń» 2 býmasyn 1400 teńgeden satqanyn anyqtady (belgilengen baǵasy - 700 teńge).
Jinaqtalǵan materialdy politseiler zańdy sheshim qabyldaý úshin Túrkistan oblysy boiynsha farmatsevtikalyq baqylaý bólimine joldady.
Óz kezeginde Túrkistan oblysynyń politseileri azamattarǵa karantin men maska rejimin saqtaý qajettigin eskertedi.
