Elorda ákimdigi Arystan Nur-Sultan qalasyna keletin balalarǵa keshendi saiahat baǵdarlamasyn daiyndap jatyr, dep habarlaidy QazAqparat.
Nur-Sultan qalasy ákiminiń orynbasary Erlan Kanalimovtyń aitýynsha, elordaǵa keletin arystyq balalardyń alǵashqy legin ákimdik ókilderi dúisenbi kúni qarsy almaq.
«Alǵashqy 200 balany Dimash Qudaibergenniń kontsertine aparamyz dep josparlaǵan edik. Temirjol bailanysyndaǵy kedergilerge bailanysty olar dúisenbide ǵana keletin boldy. Degenmen, olar súiikti ánshilerimen kezdesedi. Aldyn ala kelisim de bar. Sondai-aq, balalar Erjan Maksimmen de kezdesedi. Jalpy elordaǵa kelgen árbir arystyq bala úshin bul sapar este qalar estelikterge toly bolady» deidi ákimdik ókili.
Shahar basshysynyń orynbasary Arystan keletin balalar úshin túrli kontsertter men baiqaýlar, saiahattar, tanymal sportshylarmen suhbattar uiymdastyrylatynyn da atady.
«Biz shaqyryp otyrǵan 500 balanyń kóbi 6,7,8 synyp oqýshylary. Olardyń bárine jańa oqý jylyna qajet quraldar syilasaq dep otyrmyz. Al L.N.Gýmilev atyndaǵy Eýraziia ulttyq ýniversiteti 1000 balany shaqyryp otyr. Onda negizinen 9, 10, 11 synyp oqýshylaryn ákelý josparlanǵan. Balalar ýniversitet jataqhanalarynda ornalasyp, mamandyq tańdaý boiynsha paidaly aqparat alyp qaitatyn bolady» deidi Erlan Kanalimov.
Eske salsaq, búgin elordadan 80 tonna gýmanitarlyq kómek jolǵa shyqty.
