Túrkistan oblysy ákimdiginiń baspasóz qyzmeti Arysta bolǵan tótenshe jaǵdaiǵa bailanysty 100 myń teńge ótemaqy beriletin eldi mekenderdiń tizimin jariia etti, dep habarlaidy "Ult aqparat".
"Arys qalasyndaǵy tótenshe jaǵdaiǵa bailanysty 100 myń teńge ótemaqy berý boiynsha túrli saýaldar týyndaýda. Kórshi eldi meken turǵyndarynan suraqtar kelip túsýde. Alaida QR Úkimeti bekitken tizim boiynsha ótemaqy beriledi. Atap aitqanda,
Arys qalasy boiynsha - 44 994 adam,
Aqdala aýyl okrýginde - 4 324 adam,
Qojatoǵai aýyl okrýgi boiynsha - 4 232 adam,
Dermene aýyl okrýginde - 2 052 adam.
Jalpy birinshi kezekte 55 602 turǵynǵa 100 myń teńgeden 5,6 milliard teńge kóleminde ótemaqy tóleý josparlanyp otyr. Ótemaqy tóleýge QR Úkimetiniń rezervi esebinen 3 milliard teńge, oblystyq biýdjetten 1 mlrd. teńge jáne arnaiy qurylǵan "Túrkistan" áleýmettik qoryna túsken qarjydan 1,6 milliard teńge bólinedi dep kútiledi.
Jergilikti turǵyndardan qujattardy qysqamerzimde jinaýǵa Arys qalasyndaǵy 17 sektorda bekitilgen tiisti mamandar jáne aýdan, qala ákimdikteriniń qyzmetkerleri jumyldyryǵan. Olar 2019 jyldyń 3 shildesinen bastap ótemaqy alýǵa ótinishter jinaqtalyp jatyr.
Eske sala ketsek, Arys qalasyndaǵy áskeri bólimniń qoimasynda 24 maýsym kúni tańerteń jarylys boldy. Saldarynan úsh adam qaza tapty - Arys turǵyny men eki áskeri qyzmetshi. 170-ke jýyq adam zardap shekti. 20-ǵa jýyq úi, 9 qora-qopsy janyp, dalaly aýmaqta 14 oshaq tutandy. Úi-jailar men ǵimarattardyń 80-90 paiyzyna ártúrli deńgeide zaqym keldi. Birqatar óńirde shuǵyl jeliler quryldy.
Túrkistan oblysyna arnaiy barǵan Qazaqstan Prezidenti Qasym-Jomart Toqaev Arystaǵy áskeri bólimshedegi oq-dári qoimasyndaǵy jarylystan zardap shekken qala turǵyndarymen kezdesip, qalanyń qalpyna keltiriletinine ýáde berdi.
Úkimet otyrysynda Premer-Ministr Asqar Mamin jarylys saldarynan kóz jumǵandardyń týǵan-týystaryna kóńil aityp, turǵyndarǵa barlyq kómek kórsetiletinin aitty. Keltirilgen zalaldyń kólemi baǵalanyp, Úkimet rezervinen aqsha bólinedi.
Evakýatsiialaý kezinde myńnan astam ata-ana balarynan kóz jazyp qaldy. Sábilerdiń barlyǵy týys-týǵandaryna din-aman tapsyryldy.
Jarylys bolǵannan keiin tórtinshi kúni turǵyndar Arys qalasyna qaitty.
