Foto: Shutterstock
Mańǵystaýlyq kardiohirýrg-dárigerler aryqtatatyn dári iship, júregi toqtap qalǵan naýqasty aman alyp qaldy, - dep habarlaidy Sputnik Qazaqstan oblystyq densaýlyq saqtaý basqarmasyna silteme jasap.
30 jastaǵy naýqastyń júregi 5 minýtqa toqtap qalǵan. Ol jeltoqsan aiynda jedel júrek jetispeýshiligi diagnozymen aýrýhananyń qabyldaý bólimine óte aýyr jaǵdaida túsken. Arterialdyq qan qysymy kúrt tómendep, kardiogendi shok bolǵan. Dárigerler jedel túrde ýltra-dybystyq zertteýden ótkizip, júrektiń jiyrylý qabileti tómendegenin anyqtaidy.
"Ata-anasynyń aitýynsha, naýqas aryqtatýǵa arnalǵan dári ishken. Sonyń saldary júrekke áser etti degen tujyrymǵa keldik. Sebebi aryqtatatyn dáriniń quramynda "sibýtramin" degen ziiandy zat bar. Bul dári júrek-qan tamyr júiesiniń álsizdigine alyp keledi. Naýqastyń qan qysymy qalypqa kelmegen soń jedel túrde jasandy júrek-ókpe (EKMO) qurylǵysyna qostyq. Osylaisha, júrekke qosymsha súiemeldeý arqyly kómek berip, qan qysymyn 70-ke deiin kóterdik”, - deidi kardiohirýrg-dáriger Ábýnasyr Sýhanov.
Naýqas EKMO (jasandy júrek-ókpe) qurylǵysymen 1 apta júrgen. Nátijesinde júrektiń fraktsiiasy ósip, qan qysymy da kóterildi. Naýqas oianǵan soń EKMO jáne ókpeni jasandy jeldetý apparatynan da ajyratyldy. Qazir naýqastyń jaǵdaiy jaqsy.
"Qyzyma shuǵyl túrde kúrdeli ota jasaldy. Barlyǵy sátti boldy. Munyń bári – dárigerlerdiń sheberligi men biliktiligi jáne halyqqa qyzmet kórsetýdiń joǵary deńgeii dep esepteimin. Bul operatsiianyń barlyǵy tegin jasaldy. Júregi toqtap qalǵan qyzymdy ólimnen arashalap qaldy. Aýrýhana basshylyǵy men barlyq dárigerlerge alǵysym sheksiz", - dedi Aqtaý qalasynyń turǵyny, naýqastyń ata-anasy Meiramgýl Kenjebaeva.
Vedomstvonyń aitýynsha, mundai shuǵyl operatsiia meditsinalyq kómektiń kepildik berilgen kólemi aiasynda, al josparly operatsiialar mindetti áleýmettik meditsinalyq saqtandyrý boiynsha júrgiziledi.
