Qazaqstandyq aktrisa Arýjan Jazylbekova AQSh-ta «Eń úzdik áiel róli» syilyǵyn jeńip aldy, dep habarlaidy QazAqparat.
Sinhýa agenttiginiń habarlaýynsha, Qazaqstan men Qytai birlesip túsirgen «Kompozitor» filmi Los-Anjeles (AQSh) qalasynda ótken 4-shi kezekti «Golden screen awards» marapattaý sharasynda jyldyń «Eń úzdik kinosy», «Eń úzdik mýzyka», «Eń úzdik er adam róli» jáne «Eń úzdik áiel róli» syndy 4 nominatsiia boiynsha marapattaldy.
Aita keterligi, «Golden screen awards» sharasy China Film Co Production korporatsiiasy, Hollywood Reporter jáne Amerika kino qaýymdastyǵynyń qoldaýymen 2016 jyldan beri ótkizilip keledi. Sharanyń basty maqsaty - qytailyq jáne sheteldik kino stýdiianyń birigip túsirgen úzdik kinolaryn marapattaý.
Eske salaiyq, «Kompozitor» filminiń tusaý keseri aǵymdaǵy jyldyń 17 mamyr kúni elordada ótken bolatyn. Atalǵan film álemdik ónerge eleýli úles qosqan Qytaidyń tanymal kompozitory Si Sinhaidyń ómiri men óner jolyna arnalǵan. Ekinshi dúniejúzilik soǵys jyldarynda (1941-1943 jyldar aralyǵynda) ol Qazaqstanda turyp, qazaqtyń talantty kompozitory Baqytjan Baiqadamovpen dos bolǵan. Kartina eki el arasyndaǵy yntymaqtastyq pen kompozitorlardyń dostyǵy týraly syr shertedi.
Filmdi Sh.Aimanov atyndaǵy «Qazaqfilm» kinostýdiiasy jáne qytailyq «Shineworks Pictures», «China film coproduction corporation» kompaniialary birge túsirgen.
