Bala quqyqtary jónindegi ýákil Arýjan Sain qazaq tildi jýrnalisterden keshirim surady, dep habarlaidy Sputnik Qazaqstan.
Búgin Ortalyq kommýnikatsiialar qyzmetinde ótken baspasóz máslihatynda Arýjan Sain óziniń aldaǵy josparyn tanystyrdy. Jarty saǵattan astam ýaqyt sóilegen ýákil óz baiandamasyn tolyǵymen resmi tilde jasady. Osydan keiin qazaq tildi jýrnalister oǵan eskertý jasap, memlekettik tilde sóileý kerektigin jetkizdi.
"Meniń qazaq tilim áli onsha jaqsy emes. Spetsifika jaǵynan... terminderdi paidalanǵanda maǵan qiyn. Sizdermen jai sóilese alamyn. Biraq bizdiń máselelerimiz týraly áli aita almaimyn. Árine, kún saiyn qazaq tilindegi mátinderdi oqyp, jattap, sóileýge tyrysamyn. Biraq keshirińiz... bolashaqta. Birinshiden, ýaqyt kerek oǵan. Qazir ýaqyt joq", - dedi Sain.
Aita keteiik, búgingi brifingte Sain barlyq internatty jabýdy usyndy. Onyń aitýynsha, kásibi fosterlik otbasylar bolsa, balalar úilerin tolyǵymen jaýyp tastaýǵa bolady.
"Qazaqstanǵa shamamen 350-500 fosterlik otbasy qajet. Sebebi jyl saiyn 1 500 bala ata-anasynyń asyraýynsyz qalyp jatady. Sonda bir fosterlik otbasy 3-5 balany alsa, qazirgi internat máselesin tolyǵymen sheshýge bolady", - deidi Sain.
