Arýjan Sain qazaq tilin durys bilmeidi dep atqarǵan jumysyna qara kúie jaǵa salýǵa bolmaidy. Bul týraly «Qazaqstan» telearnasynyń «Kózqaras» baǵdarlamasyna suhbat bergen QR Aqparat jáne qoǵamdyq damý ministri Dáýren Abaev aitty, dep habarlaidy QazAqparat.
Suhbat barysynda baǵdarlama tizginshisi ministrden qazaqtildi spiker tabý - qazaqtildi jýrnalister úshin qiyn sharýa ekendigin aityp, osyǵan orai ne isteý kerektigin suraǵan edi.
«Suraý kerek, talap etý kerek. Árine, árbir memlekettik organnyń baspasóz qyzmeti jumysyn sapaly júrgizýi tiis. Aqparatty qazaq tilinde alý, suraý - jýrnalisterdiń emes, qoǵamnyń, ýaqyttyń talaby. Qoǵam, ózderińiz de jaqsy bilesizder, qazaqylanyp kele jatyr. Sondyqtan da memlekettik organdar osyny túsinýi qajet. Biraq jýrnalister de máseleniń baiybyna barýy kerek. Áiteýir suraý kerek eken dep oiyna kelgen suraqty qoia salýǵa bolmaidy. Qisyndy, oryndy, eń bastysy - qoǵamǵa qajetti degen saýatty saýal bolýy tiis», - dedi ministr.
Onyń aitýynsha, suraq utymdy, qoǵamnyń kókeiinde júrgen bolsa, qandai tilde qoiylsa da, kórermenge jetedi.
«Bizdiń áriptester osyny da eskerýi kerek dep oilaimyn. Ekinshiden, biz de til máselesin qoldan ýshyqtyra bermeýimiz kerek. Mysaly, siýjetten Arýjan Saindy kórdik. Ol qazaq tilin bilmeitin shyǵar. Biraq bizdiń qazaq balalarynyń múddesin qorǵap, kómektesip júr. Meniń oiymsha, Arýjan Sain qoldap, qorǵap júrgen balalardyń bireýi múmkin keleshekte qazaq tiliniń bailyǵy men kórkemdigin dúnie júzine tanytatyn jazýshy bolatyn shyǵar. Kim biledi? Sondyqtan Arýjan Sain qazaq tilin durys bilmeidi eken dep onyń atqaryp otyrǵan barlyq jumysyn joqqa shyǵaryp, qara kúie jaǵa salý qanshalyqty qisyndy? Osyndai dúnielerden saq bolýymyz kerek», - dedi Dáýren Abaev.
