QR Bala quqyqtary jónindegi ýákil Arýjan Sain Rýdnyidaǵy balalar úiinde bolǵan jaǵdaiǵa qatysty QR Bas prokýratýrasyna joldaǵan saýalyna jaýap almaǵan, dep habarlaidy "Ult aqparat".
«Rýdnyidaǵy balalar úiinde bolǵan jaǵdai ata-ananyń qamqorlyǵynsyz qalǵan balalarǵa arnalǵan mekemelerdi únemi qadaǵalap otyrý qajettigin taǵy bir ret kórsetip berdi. Qadaǵalaý tek memlekettik organdar tarapynan ǵana emes, qoǵamdyq uiymdar tarapynan da júrýi tiis. Buǵan deiin de prokýrorlyq tekserýler men UNISEF, Human Rights Watch siiaqty halyqaralyq uiymdardyń zertteýleri kezinde balalardyń quqyqtaryn taptaý faktileri anyqtalǵany týraly talai jazǵanmyn. Qazaqstan atalmysh balalardy ornalastyrýdyń otbasylyq normalaryn damytý jáne memlekettik mekemeler júiesin institýtsyzdandyrý jónindegi usynymdardy oryndaýǵa tiis. Osyǵan bailanysty, 25 shildede Bala quqyqtary jónindegi ýákil retinde QR Bas prokýratýrasyna hat joldaǵanmyn. Áli jaýap alǵan joqpyz», dep jazdy Arýjan Sain Facebook-tegi paraqshasynda.
Óz jazbasynda resmi ýákil quzyrly organǵa joldanǵan saýaldyń mátini men kóshirmesin usynǵan. Ol hatynda QR Bas prokýrorynan barlyq internat úlgisindegi balalar mekemesine tekserý júrgýizýdi suraǵan.
