Memlekettik komissiia tórt jumysshy qaza tapqan «ArselorMittal Temirtaý» AQ-daǵy jazataiym oqiǵa jumys berýshiniń kinásinen bolǵanyn anyqtady, dep habarlaidy Ulysmedia.kz.
«Saraptamalyq uiymdar apatqa sebep bolýy múmkin aqaýlar men zaqymdanýlardy anyqtady. Sondai-aq, tapsyrys berýshi «Qurylysmet» pen merdiger «ArselorMittal Temirtaý» qurylys-montajdaý jumystaryn júrgizý qaýipsizdigin qamtamasyz etpegeni belgili boldy. Jobalaý qujattamasy bekitilmegen. Óndiris jobasy men peshti bólshekteýdiń tehnologiialyq kartasy saraptamalyq komissiialardyń qaraýyna usynylmaǵan. Arnaiy tergeý qorytyndysy boiynsha komissiia jumys berýshiniń júz paiyz kinásin anyqtady», - dedi memlekettik komissiia tóraǵasy, Qaraǵandy oblysy boiynsha bas memlekettik eńbek inspektory Irina Liýbarskaia.
Tergeý komissiiasyna jergilikti atqarýshy organdardyń, kásipodaqtyń, jumys berýshiniń ókilderi jáne saraptama uiymdary kirdi. Komissiia eki aptaǵa jýyq ýaqyt ishinde oqiǵa ornyn tekserdi, tehnikalyq jáne normativtik qujattardy zerttedi, qatysy bar adamdarmen, kýágerlermen suhbattasty.
Anyqtalǵanyndai, jumysshylar jetkilikti dárejede bilikti, iaǵni 5 jáne 6-razriadtary bolǵan. Biraq, olar úsh kún qatarynan aýysymsyz demontaj jasaǵan. Qaiǵyly oqiǵa jóndeý jumysynyń aiaqtalýyna 25% qalǵanda, iaǵni sońǵy kúni bolǵan.
Tergeý barysynda 32 adam suraýǵa alyndy. 14 kúdikti anyqtaldy, onyń ishinde basshylyq quram da bar. Materialdardyń kóshirmeleri aýmaqtyq politsiia organyna jiberiledi.
Eske sala keteiik, 10 maýsymda «Qurylysmet» JShS («ArselorMittal Temirtaý» AQ enshiles kásiporny) master-press tsehynyń jumys istemeitin №9 termiialyq peshinde otqa tózimdi qurylysty bólshekteý kezinde shatyr opyrylyp qulaǵan. Jóndeý tsehynyń 5 jumysshysy úiindi astynda qaldy. Onyń tórteýi kóz jumyp, bireýi aýrýhanaǵa jetkizildi.
