Qaraǵandy oblysyndaǵy shahtalar men metallýrgiia kombinattarynyń iesi "ArselorMittal Temirtaý" kompaniiasy 1 shildeden bastap jumysshylarynyń jalaqasyn ósiretinin málimdedi. AMT jalaqy ósirý týraly sheshim qabyldaǵanda taý-ken salasyndaǵy "tabys kólemin saralap", "azyq-túlik, basqa da taýarlardyń, kommýnaldyq qyzmet qunynyń qymbattaýyn" eskergen. Bul sheshim kásipodaqtarmen talqylanǵan.
"Jalaqy ósirý birtindep, ai saiyn 20 myń teńgeden ia ailyq tabysynyń 6 paiyzy mólsherinde qosylady" dep habarlady kompaniia resmi saitynda.
Osyǵan deiin AMT bas direktory Bidjý Nair da jalaqy ósetinin aitqan.
Kompaniia "áleýmettik qosymsha qoldaý úshin" shildeniń basynda jumysshylarǵa bir rettik 150 myń teńge tóleitinin málimdedi.
AMT jalaqy ósirý sheshimin kompaniiada túrli oqys oqiǵalar men adam ólimi jiilegen tusta qabyldady.
Mamyrdyń sońynda Temirtaýdaǵy metallýrgiialyq kombinatta oqys oqiǵa bolyp, eki jumysshynyń denesi kúiip, aýyr halde aýrýhanaǵa túsken. Osydan soń jelide turǵyndar men blogerler kombinattar men shahtalardaǵy jumys jaǵdaiynyń nasharlyǵyn aityp, dabyl qaqqan.
2018 jyly AMT kombinatynda bolǵan apattan soń májilis depýtaty Albert Raý jaǵdaiǵa alańdap, premer-ministrge qaiyrylǵan. Depýtat "ken ornyn jańalaý men ony jóndeýge jetkilikti qarjy bólinbegendikten apat bolyp jatyr" degen.
Sol kezde ministrler kabineti "AMT kompaniiasynyń jumysy úkimettiń baqylaýynda" dep málimdegen.
