elements.envato.com
"ArselorMittal Temirtaý" kompaniiasy 10 maýsymdaǵy apat kezinde qaza tapqan metallýrgterdiń otbasyna on jyldyq jalaqy tóledi, - dep habarlaidy Tengrinews.kz.
Sondai-aq, kompaniia zardap shekkenderdiń balalarynyń oqý aqysyn tóleýge, otbasylaryna baspana alýǵa kómektesýge mindetteme aldy.
"Eshqandai materialdyq qoldaý otbasylardyń qaiǵysyn jubata almaidy. Soǵan qaramastan, kompaniia otbasylarǵa barlyq qajetti qoldaýdy kórsetetinine jeke ózim sendiremin", - dedi "ArselorMittal Temirtaý" AQ bas direktory Bidjý Nair.
Ár otbasyna on jyldyq jalaqydan bólek, kompaniia árbir balaǵa 18 jasqa deiin nemese joǵary bilim alǵan jaǵdaida 23 jasqa deiin ai saiynǵy saqtandyrý tólemin tóleidi. Qajet bolǵan jaǵdaida qaza tapqandardyń otbasylaryna baspana alýǵa kómektesedi nemese birjolǵy ótemaqy tóleidi. Úidi jóndeýge qarajat beredi nemese ipotekalyq tólemderdiń belgili bir bóligin tólep beredi. Seriktestik kásiporyndarynda áielderi men balalaryn jumysqa ornalastyrýǵa járdemdesedi. Áielderi men balalaryna sanatoriiler men balalar lagerlerine jyl saiyn joldamalar beredi.
Eske salaiyq, 10 maýsymda metallýrgiialyq zaýytta "Qurylysmet" JShS-niń ("ArselorMittal Temirtaýdyń" enshiles kásiporny) soǵý-presteý tsehyndaǵy termiialyq peshti demontajdaý kezinde peshtiń shatyry opyrylǵan bolatyn. Úiindi astynda bes jumysshy bolǵan. Tórteýi qaza taýyp, bireýi aman qalǵan edi.
