Sýret: arcelormittal.kz
Inspektorlar Qaraǵandy oblysyndaǵy "ArselorMittal Temirtaý" kásipornynan qaýipsizdik talaptary saqtalmaýyna bailanysty 471 zańbuzýshylyq deregin anyqtaǵan. Bul týraly QR TJM janyndaǵy ónerkásiptik qaýipsizdik komiteti ókili aitty, - dep habarlaidy Tengrinews.kz agenttigi nv.kz saityna silteme jasap.
Memlekettik inspektorlar Qaraǵandy oblysyndaǵy kompaniianyń qaýipti óndiristik nysandaryn teksergen. Olar kópir krandaryn, qysymmen jumys isteitin ydystardy, qazandyqtardy, gaz qubyrlaryn, metallýrgiialyq jabdyqtardy teksergen. Mamandar anyqtalǵan zańbuzýshylyqtardy joiý týraly nusqaý berip, QR ÁQBtK-niń 298-baby 1-bóligi boiynsha aiyppul túrinde ákimshilik jaza qoldanǵan.
Anyqtalǵan negizgi zańbuzýshylyqtar:
- ónerkásiptik qaýipsizdik saraptamasyn júzege asyrmaý;
- qaýipti nysandar men qurylǵylardy ýaqtyly jańartpaý;
- óndiristik ǵimarattar men tehnologiialyq qurylystardy ýaqtyly teksermeý;
- júkkótergish krandardyń tirek qurylǵylaryn jobasyz jóndeý jáne dánekerleý qosylystarynyń sapasynsyz baǵalaý;
- jaramsyz aspaptary bar júkkótergish krandardy paidalaný;
- qaýipti óndiristik nysannyń jumysshylar shtatynyń jasaqtalmaýy.
Qaraǵandy oblysynyń mamandandyrylǵan aýdanaralyq ekonomikalyq sotyna adamnyń ómiri men densaýlyǵyna, qorshaǵan ortaǵa, jeke jáne zańdy tulǵalardyń, memlekettiń zańdy múddelerine qaýip tóndiretin zańbuzýshylyqtar boiynsha 21 qaýipti óndiristik nysan men qaýipti tehnikalyq qurylǵyny toqtata turý týraly talap-aryz jiberý arqyly jedel sharalar qabyldanǵan.
